جوزجان کې ۱۷ امنیتي سرتېرو ته مرګ ژوبله اوښتې ده

سیمه ییز امنیتي چارواکي وايي، جوزجان ولایت کې پر امنیتي پوستو د طالبانو په برید کې ۱۷ امنیتي سرتېرو ته مرګ ژوبله اوښتې ده.

د جمهور خبري آژانس د خبر له مخې د افغان ځواکونو او طالبانو تر منځ دغه نښته تېره شپه (د تلې ۱۵مه) د جوزجان ولایت په قوشتېپې ولسوالۍ کې رامنځ ته شوې ده.

د جوزجان امنیه قوماندانۍ د امنیت آمر کمال الدین یاور وايي سلګونو طالبانو په قوشتېپې ولسوالۍ کې پر ځینو امنیتی پوستو بریدونه وکړل.

نوموړي زیاته کړه، چې د طالبانو په دغه بریدونو کې شپږ د افغان پوځ سرتېري، یو د ملي امنیت سرتېری وژل شوي او شپږ د ملي اردو سرتېري او څلور سیمه ییز پولیس ټپیان شوي دي.

د هغه په وینا طالبانو د ملي اردو نمبر ۱ او نمبر ۲ پوستې هم نیولې، چې د بېرته نیولو له پاره یې پلان نیول شوی او ډېر ژر به بېرته ونیول شي.

یاور د طالبانو د مرګ ژوبلې په اړه څه ونه ویل خو د سیمې ځايي اوسېدونکو ویلي، چې په جګړه کې طالبانو ته هم مرګ ژوبله اوښتې خو دقیقه شمېره یې نه ده معلومه.

طالبانو هم په یاده سیمه کې پر امنیتي پوستو د بریدونو پخلی کړی او ویلي یې دي، چې دوه پوستې یې نیولې، ۱۳ پولیس یې وژلي او ۲۰ نور یې ټپیان کړي دي.

طالبانو په جګړه کې د خپلو دوه ملګرو د ټپي کېدو پخلی هم کړی دی.

جمهورخبري آژانس:کابل