د بلک واټر امنیتي کمپنۍ مشر د ولسمشر غني له سیاسي مخالفینو سره لیدلي

راپورونه وايي، د بلک واټر امریکايي امنیتي کمپنۍ مشر اریک پرېنس د ولسمشر غني له سیاسي مخالفانو سره پټې کتنې کړې دي.

د جمهور خبري آژانس د خبر له مخې نیویارک ټایمز ورځپاڼې راپور ورکړی، ارېک پرېنس هڅه کوي، هڅه کوي د افغانستان جګړه په قرارداد واخلي او د افغانستان کانونه استخراج کړي، خو ولسمشر غني یې پر وړاندې خنډ دی.

ورځپاڼې زیاته کړې، پرېنس په همدې موخه چې له کوم کسانو سره کتلي ټول هغه دي، چې د ولسمشر غني د واک د پای ته رسېدو هڅه کوي.

نیویارک ټایمز زیاته کړې د بلک واټر مشر هغوی ته ویلي چې که د افغانستان حکومت ورسره موافقه وکړي، د امریکا دفاع او بهرنیو چارو وزارت د افغانستان د جګړې له خصوصي کېدو سره مخالفت نه کوي.

ویل کېږي چې ایریک پرینس په کابل کې د افغانستان د کانونو وزارت له ځینو چارواکو سره هم کتلي دي.

اریک پرینس د افغانستان د جګړې د خصوصي کېدو له وړاندیز سره دا هم غوټه کړې چې د افغانستان د قیمتي مینرالونو په شمول د کانونو د ایستلو چارې به هم ورسپارل کېږي چې د جګړې لګښت له دې لارې پوره کړي.

د بلک واټر مشر له افغانانو سره په کتنو کې ویلي چې له افریقا څخه به د کانونو د سپړلو ماشینونه افغانستان ته راوړي او تر هر څه وړاندې به د لوګر پر عینک کان کار پیل کړي.

ورځپاڼه وايي چې دا هغه شی دی چې ولسمشر ټرمپ هم ورته لېواله دی.

نیویارک ټایمز وايي، پرینس له یوې رسنۍ سره په خبرو کې د خپلو هدفونو د تشریخ کولو په مهال یو دا وښود«د امریکا د لوړې ټکنالوژۍ د پرمختګ لپاره د نادرو او کلیدي مینرالونو استخراجول…»

ورځپاڼې د یو شمېر جګپوړو امریکايي چارواکو نظرونه هم خپاره کړي چې د بلک واټر له وړاندیزونو سره یې مخالفت کړی او ویلي دي چې د ایریک پرینس نسخه د افغانستان لپاره ګټوره نه ده.

ورځپاڼه ښاغلي پرینس ته د نژدې افغان چارواکو په قول وايي، په حکومت کې ځینو چارواکو حتي هڅه کړې چې اریک پرینس ته وېزه منع کړي.

راپور زیاتوي، د بلک واټر امنیتي کمپنۍ مشر څو ځلې هڅه کړې چې په کابل کې له ولسمشر اشرف غني سره وویني خو ولسمشر غني یې هر ځل غوښتنه ور رد کړې ده.

د بلک واټر مشر د افغانستان ولسمشر د خپل پلان د اجرا لپاره لوی خنډ بولي.

ښاغلي غني د تېرې اوونۍ د دوشنبې په ورځ بلک واټر ته په اشارې په تونده وویل«بهرنیو امنیتي کمپنیو ته به هیڅکله اجازه ورنه کړي چې هیواد ته راشي.»

د پنجشنبې په ورځ د افغانستان د ملي امنیت سلاکار هم په یوه بیان کې وویل چې د افغانستان حکومت به اجازه ورنه کړي چې له تروریزم سره مبارزه د پیسو د ګټلو لپاره پر تجارت بدله شي.

جمهورخبري آژانس:کابل