د چین ولسمشر جین پینګ او د هند لومړي وزیر نریندرا مودي د دواړو هېوادونو تر منځ د خپل منځي اړیکو پر پراختیا ټینګار کړی دی.
د جمهور آژانس د خبر له مخې ښاغلي پینګ او ښاغلي مودي په جنوبي افریقا کې یو له بل سره لیدلي او په سیمه کې یې د سترو پروژو پر پلي کولو هم خبرې اترې کړې دي.
د هند لومړي وزیر نریندرا مودي چین یو ښه ملګری بللی او ویلي یې دي دواړه لوري هڅې پیل کړې، چې اړیکې له سره جوړې او شته ستونزې له منځه یوسي.
د ښاعلي مودي په وینا په درېیو میاشتو کې ددواړو لورو ترمنځ درې ځله لیدنه دا ثابتوي چې د دواړو هېوادونو ترمنځ اړیکې خورا ښې دي.
په ورته وخت د چین ولسمشر هم ویلي، چې له هند سره د سوداګرۍ، اقتصاد او ترانزیت په برخه کې د ښو اړیکو غوښتونکی دی او په دې برخه کې به خپلې هڅې کوي.
باید و ویل شي، چې د چین ولسمشر او د هند لومړي وزیر نریندرا مودي د لومړي ځل لپاره درې میاشتې مخکې د اړیکو ښه کول پیل کړل.
په لومړنۍ لیدنه کې دواړو موافقه کړې وهو چې په افغانستان کې به د ثبات لپاره کار کوي او دلته به پر ځینو ګډو پروژو کار پيلوي.
جمهورخبري آژانس:کابل
