وزارت خارجه تاجیکستان سفیر افغانستان را در آن کشور در واکنش به اظهارات اخیر قیوم کوچی، سفیر افغانستان در روسیه، احضار کرده است.
به گزارش خبرگزرای جمهور، وزارت خارجه‌ تاجیکستان در واکنش به اظهارات قیوم کوچی، سفیر افغانستان در روسیه و کاکای رییس جمهور، سفیر کشور را احضار کرده و در نامه ای از حکومت افغانستان خواسته که در مورد اظهارات آقای کوچی بررسی و اقدام جدی کند.
به نقل از تلویزیون یک؛ در این نامه وزارت خارجه‌ تاجیکستان نوشته است که آقای کوچی بدون داشتن سند مردم و رهبری تاجیکستان را متهم و به هویت این کشور توهین کرده است.
وزارت خارجه‌ کشور موضوع این نامه را تایید کرد، ولی در مورد آن ابراز نظر نکرد.
قیوم کوچی، سفیر افغانستان در مسکو در گفتگو با یک شبکه‌ی تلویزیونی موسوم به "شفیع عیار" مقیم امریکا، مردم تاجیکستان را متهم به دست داشتن در روند تهیه‌ مواد مخدر افغانستان، کرده است.
در این ویدیوی که به تاریخ اول جدی ۱۳۹۵ در شبکه‌ی یوتیوب "شفیع عیار" پخش شده، آقای کوچی گفته است که او برای تداوی همسرش به امریکا سفر کرده و در این جریان با سفیر روسیه و شماری از متخصصان آن کشور دیدار کرده است.
او به این مقام‌های روسی گفته است: "مواد مخدر در افغانستان کشت می‌شود، ولی پشت آن شما استید (روس‌ها)، پشت آن مافیای تاجیکستان است."
آقای کوچی افزوده است: "تاجیکستان یک کشور بسیار کوچک است. حتا پنچ میلیون نفوس ندارد و یک میلیون آن هم روس است. فرهنگ‌ و زبان رسمی‌‍شان روسی است. حق ندارند زبان خود را بنویسند و حتا الفبای دری را تغییر داده‌‍اند. مافیا در این کشور بسیار فعال است."
سفیر روسیه در افغانستان همچنین گفته است مواد مخدر در افغانستان ساخته‌ می‌شود، ولی مراحل بعدی آن توسط مافیای انجام می‌شود و از همه بیشتر "روسیه" منتظر تولید آن است.
خبرگزاری جمهور-کابل