سیمه ییز امنیتي چارواکي وايي، پاکستاني ځواکونو یو ځل بیا د ډېورنډ فرضي کرښې له پورې غاړې په کنړ ولایت لسګونه توغندي ویشتلي دي.
د جمهور آژانس د کونړ د امنیه قوماندانۍ ویاند فرید الله دهقان زیاتوي، چې دغه توغندي د کنړ ولایت په دانګام او ناړې ولسوالیو توغول شوي دي.
د هغه په وینا پاکستاني پوځیانو پر دانګام ولسوالۍ ۸۵ توغندي توغولي، چې ۵۰ یې د زوړ برول او سور کمر په سیمو او دغه راز ۳۵ نور د ناړې ولسوالۍ په پاټاش او چهره ګل په سیمو کې لګېدلي دي.
د کنړ د امنیه قوماندانۍ ویاند وايي، دا چې په توغندیو ویشتل شوې سیمې لرې پرتې دي، نو ځکه یې تر اوسه د مرګ ژوبلې په اړه معلومات نشته.
پاکستان یو ځل بیا پر داسې مهال د افغانستان پر خاوره توغندي بریدونه کړي، چې څو ورځې وړاندې افغان ولسمشر محمد اشرف غني د دغه هېواد بهرنیو چارو د وزارت د مرستیالې تهمینه جنجوا په خبرو کې په دې خپله اندېښنه شریکه کړې وه.
هغه مهال د ارګ نه خپره شوې خبرپانه کې ویل شوي وو، چې ولسمشر د پاکستان د بهرنیو چارو وزارت له مرستیالې غوښتي چې افغان حکومت اندېښنې دې د پاکستان له نوي مشرتابه سره شریکې کړي.
جمهورآژانس:کونړ
