نگرانی‌ها از افزایش بیماری سرخکان در ولایت بغلان

مسوولان در ریاست صحت عامه ولایت بغلان از افزایش بیماری سرخکان در این ولایت ابراز نگرانی می کنند.
محیب الله حبیب، رییس صحت عامه ولایت بغلان در صحبت به خبرگزاری جمهور گفت که قراراست در سرتاسر ولایت بغلان واکسین پولیو و سرخکان برای کودکان زیر سن پنج سال تطبیق شود.
وی افزود که ۱۸۰۰ نفر از کارمندان صحی امروز سه شنبه (۲۹حمل) روند تطبیق واکسیناسیون را آغاز کرده اند و قرار است ۳۰۰ هزار کودک زیر سن پنج سال، واکسین پولیو وسرخکان شوند.
آقای حبیب می گوید که بیماری سرخکان در این ولایت افزایش یافته است.
اما وی نگفت که چند درصد، این بیماری در میان کودکان ولایت بغلان افزایش یافته است.
رییس صحت عامه ولایت بغلان می گوید که کارمندان صحی برای تطبیق روند واکسیناسیون متعهد هستند و در ساحاتی که گروه طالبان نیز حاکمیت دارند، برای نجات کودکان حضور خواهند یافت.
انیتا کارگر- بغلان