چارواکي وایي، ناپېژانده وسله والو کسانو په لغمان ولایت کې ۱۴ غړو ته مرګ ژوبله اړولې، چې ښځې او ماشومان هم په کې شامل دي.
د جمهور آژانس د خبر له مخې د لغمان د والي ویاند سرحدي ځواک زیاتوي، چې دغه پېښه تېره شپه ۷:۳۰ د دې ولایت د بادپښ ولسوالۍ د مروت کڅ په سیمه کې رامنځ ته شوې ده.
نوموړي ویلي، چې ناپېژانده وسله والو کسانو یاد کور ته بم ورغورځولی، چې له امله یې د یادې کورنۍ یو شمېر غړو ته مرګ ژوبله اوښتې ده.
ځواک وايي والي د یادې ولسوالۍ اړونده چارواکو ته دنده سپارلې تر څو د یادې پېښې په اړه بشپړ تحقیقات وکړي او معلومات یې له دوی سره شریک کړي.
که څه هم ویل کېږي، په دغه پېښه کې د یادې کورنۍ ۱۰ غړي وژل شوي او ۴ نور ټپیان شوي، خو ځینې شرچینې زیاتوي، چې په دې پېښه کې ۱۷ تنه وژل شوي دي.
د دغه کورنۍ ځینې خپلوان وايي، چې دوی له هېچا سره شخصي دښمني نه درلوده او نه پوهېږي، چې دا کار به چا کړی وي.
خو ځینې سرچینې وايي، د یادې کورنۍ یو تن مخکي د یوه نظامی امبولانس موټر چلوونکی و او وسله والو کسانو څو ځلې ګواښ ورته کړی و، چې د همدې ګواښونو له امله هغه اوس دنده هم پرېښې وه.
تر اوسه د دغه پېښې مسؤولیت چا پر غاړه نه دی اخیستی.
جمهورآژانس:لغمان