د حزب اسلامي یو تن لوړ پوړی غړی محمد امین کریم وايي، ډېر ژر به د دغه ګوند یوه سل کسیزه ډله زندانیان له بنده را خلاص شي.
د جمهور آژانس د خبر له مخې کریم دوی د خپلو ۲۰۰ زندانیانو یو لیست تیار کړی و چې تر ډیرو مشورو وروسته د ۴۸۸ کسانو، نوملړ افغان حکومت ته سپارل شوی دی.
نوموړی چې د حزب اسلامي له خوا د حکومت سره د کړې هوکړې د عملي کولو د کمېټې غړی هم دی، زیاته کړې چې له دغه بندیانو څخه به په نېږدې راتلونکي کې سل تنه راخوشي شي.
کریم ویلي چې د هوکړه لیک پر عملي کولو کار روان دی او دواړه اړخونه یې عملي کولو ته ژمن دي.
په ورته وخت کې د حزب اسلامي دغه غړی زیاتوي، چې د بندیزونو د لرې کولو لیست په نیویارک کې امنیت شورا ته سپارل شوی او کار ورباندې روان دی.
جمهورآژانس:کابل