په افغانستان کې د امریکايي ځواکونو چارواکي وايي، افغان ځواکونه له طالبانو سره په جګړه کې د تېر کال په پرتله غښتلي او برلاسي دي.
دغه څرګندونې د امریکايي ځواکونو ویاند جنرال چارلز کلیفلېنډ تېره ورځ د ویډیو کنفرانس له لارې له کابله په واشنګټن کې خبریالانو ته کړې دي.
نوموړي په خپلو خبرو کې ویلي چې افغانستان د جګړې د فصل په پیل کې دی او سخته ورځې یې مخکې شته، خو په وینا یې افغان ځواکونه سږ کال د تېرو کلونو په پرتله په جګړه کې تکړه شوي دي.
هغه د افغان هوایي ځواکونو ستاینه وکړه او ویې ویل چې په یوه اوونۍ کې یې څو ځله پر وسله والو بمباري وکړه.
ده دا هم وویل، چې راتلونکې میاشت به افغان ځواکونو ته څلور نورې جنګي الوتکې وسپارل شي چې شمېربه یې اتو ته ورسیږي.
کلېفلېنډ وویل تمه لري، افغان ځواکونه به هغه سیمې چې تېر کال یې له لاسه ورکړې وې، سږ کال بېرته له طالبانو ونیسي.
جمهورآژانس:کابل