سیمه ییز پولیس چارواکي وايي، په اروزګان ولایت کې د یوې امنیتي پوستې ۱۱ تنه ملي پولیس له طالبانو سره یو ځای شوي.
د جمهور آژانس د خبر له مخې پېښه تېره شپه د اروزګان ولایت د چارچینو ولسوالۍ په ساخر سیمه کې رامنځ ته شوې ده.
د چهارچینو ولسوالۍ د سیمه ییزه پولیسو قوماندان محمد هاشم حقمل رسنیو ته ویلي، چې په ساخر سیمه کې د یوې امنیتي پوستې ۱۱ تنه پولیس له وسله والو طالبانو سره یو ځای شوي.
نوموړي زیاته کړې، چې د دغه پوستې د پولیسو مشري د فضل احمد په نوم یوه پولیس کوله، چې هغه هم له وسلو سره یو ځای طالبانو ته په ورغلو کسانو کې شامل دی.
ده دا هم وویل، چې د چهارچینو ولسوالۍ د امنیه قومندانۍ یو متمد هم د قومندانۍ د پولیسو ټول اسناد له ځانه سره وړي او وسله والو طالبانو ته تللی دی.
تر اوسه کورنیو چارو وزارت، د اروزګان ولایتي چارواکو او وسله والو طالبانو په دې اړه څه نه دي ویلي.
دا په داسې حال کې ده، چې دوه ورځې وړاندې په همدې سیمه کې ۶ تنه پولیس د خپلو دریو ملګرو له خوا څخه و وژل شول او برید کوونکي وسله والو طالبانو ته ورغلل.
جمهورآژانس:اروزګان