د افغانستان د کورنیو چارو وزارت وايي، هغه کس یې نیولی، چې په دې وزارت کې یې دوه تنه امریکایي سلاکاران وژلي وو.
د جمهور آژانس د خبر له مخې د کورنيو چارو وزارت وياند صديق صديقي وايي، شکمن کس عبدالصبور نومېږي او څلور کاله وړاندې يې دوه امريکايي سلاکاران وژلي وو.
نوموړي وویل، چې عبدالصبور تېره ورځ د بامیانو ولایت په یکاولنګ ولسوالۍ کې د پولیسو له خوا نیول شوی او کابل ته رالېږدول شوی دی.
باید وویل شي یو تن وسله وال څلور کاله وړاندې په کورنیو چارو وزارت کې پر دوه لوړ پوړو امریکايي سلاکارانو ډلې وکړې او هغه یې و وژل.
هغه مهال پولیسو ویلی وو، چې برید کوونکی عبدالصبور نومېږي، چې د کورنیو چارو وزارت د استخباراتو ریاست کارکوونکی او د پروان ولایت اوسېدونکی و.
جمهورآژانس:کابل