د هند د بهرنیو چارو وزیره مېرمن سوشما سواراج وايي، د اسیا د زړه کنفرانس د هندوستان له پاره ډېر د اهمیت وړ دی، ځکه په وینا يې دغه کنفرانس د افغانستان په اړه دی.
د جمهور آژانس د خبر له مهې مېرمن سواراج دغه څرګندونې تېره ورځ ناوخته د پاکستان پلازمېنې اسلام آباد ته له رسېدو سره سم رسنیو ته وکړه.
نوموړي په خپلو خبرو کې ویلي«د اسیا زړه کنفرانس د هندوستان لپاره ډېر د اهمیت وړ دی، ځکه چې دا د افغانستان په اړه دی نو زه په ځانګړي توګه په دغه کنفرانس کې د ګډون لپاره له هندوستانه راغلې یم.د دې لپاره چې دا کنفرانس په پاکستان کې جوړ شوی نو لازمه ده چې د دغه هېواد له صدراعظم نواز شریف او خپل سیال سرتاج عزیز سره وګورم او د دواړو هېوادونو د خپل منځي اړېکو په پراختیاخبرې ورسره وکړم. ما هم دا پیغام راوړی چې زموږ تعلقات نور هم ښه پرمخ ولاړ شي.»
باید وویل شي، چې د اسیا زړه کنفرانس چې همدا اوس د پاکستان په پلازمېنه اسلام آباد کې جریان لري، د ولسمشر غني او د پاکستان د لومړي وزیر نواز شریف په وینا پرانستل شو.
جمهور آژآنس:کابل