سیمه ییز چارواکي وايي، داعش وسله والو په ننګرهار ولایت کې د یوه راکټي برید پر مهال په یوه جومات کې ۱۱ تنو ولسي وګړو ته چې لمونځ یې ادا کولو مرګ ژوبله اړولې ده.
د جمهور آژانس د خبر له مخې دغه پېښه تېره ورځ د ننګرهار ولایت په اچین ولسوالۍ کې رامنځ ته شوې ده.
د اچین ولسوال حاجي غالب وايي، پېښه هغه جومات کې رامنځ ته شوې، چې د افغان ځواکونو یوې پوستې ته څېرمه موقعیت لري.
د هغه په خبره داعش وسله والو په دغه مسجد توغنديي برید کړی، چې له امله یې پنځه تنه ولسي وګړي، چې لمونځ یې ادا کولو وژل شوي او ۶ نور ټپیان شوي دي.
د اچین ولسوال زیاتوي، چې د پېښې ټپیان ټول روغتون ته لېږدول شوي او روغتیايي حالت یې د ډاډ وړ دی.
باید وویل شي، چې په اچین ولسوالۍ کې له تېرو څو میاشتو راهیسې، د افغان ځواکونو او وسله والو طالبانو او داعش جګړه مارو تر منځ نښتې جریان لري.
جمهور آژانس
معروف سادات:ننګرهار