ولایتي چارواکي وايي، په ننګرهار، کنړ او لغمان ولایتونو کې د تېرې ورځې په زلزله کې تر اوسه پورې ۱۳۵ تنو ته مرګ ژوبله اړولې ده.
د جمهور آژآنس د خبر له مخې دغه زلزله چې تېره ورځ ۱:۴۰ بجې تر سره شوه، د ریشتر ۷.۷ درجې وه او مرکز یې د بدخشان ولایت جورم ولسوالۍ ښودل شوې ده.
د دغه زلزلې ټاکونه د افغانستان پر ګڼ ولایتونو سربېره په پاکستان، هند، نیپال او بنګلدېش کې هم احساس شوي او مرګ ژوبله یې اړولې.
زلزلې په افغانستان کې د ګڼو ځاني زیانونو سربېره زیات شمېر مالي زیانونه هم اړولي او یو شمېر کورونه یې نړولي دي.
د ننګرهار چارواکي وايي، چې د تېرې ورځې په زلزله کې په دغه ولایت کې تر اوسه پورې ۸ تنه شهیدان شوي او ۷۸
نور ټپیان شوي دي.
د ننګرهار د عامی روغتیا رييس ډاکټر نجیب الله کاموال وايي چې د نن زلزلي له امله د دوي روغتون ته تر دي دمه اته شهیدان او ۷۸ ټپیان وروړل شوي دې او ښايي د مرګ ژوبلې شمېره نوره هم زیاته شي.
بل خوا د لغمان د والي ویاند سرحدي ځواک وايي، د لومړنیو معلوماتو له مخې د بادپښ ولسوالۍ پرته د لغمان ولایت د مرکز په ګډون په څلور ولسوالیو کې تر دې دمه ۳۲ کورنۍ زیانمنې شوې دي.
نوموړي زیاته کړې، چې د دولت شاه ولسوالۍ په نیویا سیمه کې ۳ تنه چې یوه مېرمن یو نارینه او یو ماشوم دی شهیدان شوي دي.
دغه راز نوموړی وايي،د الینګار ولسوالۍ په رجعيي سیمه کې په یوې میرمنې د زلزلې له ویرې د زړه حمله راغلې او وفات شوې ده.
د نوموړي په خبره په دغه زلزله کې تر دې دمه ۹ کسان زخمیان شوي دي چې په زخمیانو کې یوه اووه کلنه انجلۍ او اته نارینه شامل دي.
بل خوا د دې زلزلې له امله په کنړ ولایت کې تر اوسه پورې یو تن شهید شوی او نېږدې ۳۳ تنه نور ټپیان شوي او یو شمېر کورنه یې سخت زیانمن کړي دي.
د یادونې وړ ده، چې دغه زلزلې د افغانستان په شمال کې هم ګڼ مالي او ځاني زیانونه اړولي دي، خو تر اوسه یې د مرګ ژوبلې او زیان دقیق ارقام نه دي خپاره شوي.
باید وویل شي، چې افغان ولسمشر پر خلکو غږ کړی، چې له زلزله ځپلو سره مرستې وکړي.
جمهورآژانس
معروف سادات:ننګرهار