د اداري فساد پر وړاندې د مبارزې د څارنې او ارزونې خپلواکه کمېټه وايي، د برېښنايي تذکرو د وېش په اداره کې ۷۰ سلنه کارکوونکي له غير قانوني لارو پر دندو ګومارل شوي دي.
د جمهور آژانس د خبر له مخې یاده کمېټه وايي، د دوى موندنو ښودلې، چې بېلابېلو کړيو کوښښ کړى، چې په ياده شوې اداره کې د خپلو کسانو د ځاى پر ځاى کولو له لارې خپلو سياسي موخو ته ورسېږي.
دغه کمېټې زیاته کړې، چې د اوسني او پخواني حکومتونو ١٧ لوړ پوړو غړو، د ولسي جرګې يو شمېر غړو او نورو اغېزې لرونکو کسانو د برېښنايي تذکرو د وېش په اداره کې خپل کسان استخدام کړي دي.
کمېټه زیاتوي، چې د دې ټولو غير قانوني ګومارل شويو کسانو نوملړ يې د خپلو موندنو له پايلو سره يو ځاى ولسمشر اشرف غني ته لېږلى دی.
جمهور آژآنس:کابل