دادستانی کل تاجیکستان اعلان کرده است که ۲۳ مقام ارشد حزب نهضت اسلامی تاجیکستان دستگیر شده اند.
دادستانی کل گفته است که اکثر این افراد متهم اند که در حوادث خونین اخیر در تاجیکستان دست داشتند که معاون وزارت دفاع تاجیکستان آنرا رهبری می کرد.
این اداره تاکید کرده است: " قرار است تحقیقات جنایی از مقامات حزب نهضت اسلامی آغاز گردد که متهم به تروریزم، نفرت افگنی مذهبی و نژادی و تلاش قبضه قدرت از راه زور اند. چندین تن از آنها متهم به تقلب و دیگر جرایم جنایی می باشند".
گفته می شود که مقامات دستگیر شده؛ شامل معاون حزب نهضت اسلامی تاجیکستان می باشد ولی رییس این حزب محی الدین کبیری در خارج از تاجیکستان در تبعید به سر می برد.
گفتنی است که پیش از این دادگاه عالی تاجیکستان فعالیت حزب نهضت اسلامی این کشور را ممنوع اعلان و این حزب را یک گروه تروریستی معرفی کرده بود.
خبرگزاری جمهور ــ اموربین الملل