د طالبانو نوي مشر ملا اختر محمد منصور ویلي، چې د هر هغه هڅې هرکلی کوي، چې د طالبانو د جهادي فعالیتونو د ښه والي له پاره وي.
د جمهور آژآنس د خبر له مخې ملا اختر محمد منصور دغه څرګندونې پر داسې مهال کوي، چې تېره ورځ یې د مخالفې ډلې یوه ویاند ملا عبدالمنان نیازي رویټرز خبري آژانس ته ویلي، چې له ملا اختر محمد منصور سره یې د مشر تابه پر سر خبرې ناکامې شوې، او ښايي طالبان په دوه ډلو و وېشل شي.
ملا نیازي زیاته کړې وه، چې د مشرتابه پر سر د اختلاف د حل له پاره یې ملا اختر محمد منصور ته دوه میاشتې وخت ورکړی و، خو د دغه ستونزې حل ته پاملرنه ونه کړه.
نیازي ویلي«موږ دوې میاشتې انتظار وایست، غوښتل مو چې ملا منصور به وضعیت درک کړي، لېري به شي او عالي شورا به پرېږدي چې په یوه خوله نوی مشر وټاکي، خو منصور دا کار ونه کړ.»
خو ملا اختر محمد منصور په تازه څرګندونو کې د طالبانو تر منځ په درز رامنځ ته کېدو اندېښنه ښودلې او له طالبانو یې غوښتي، چې له نوي مشرتابه څخه لرې نه شي.
ښاغلي منصور خبرداری ورکړی چې د طالبانو په منځ کې د مخالفت اوازونه به یوازې طالبانو او د هغو مشرتابه ته زیان واړوي.
منصور په عین حال کې ویلي چې د طالبانو تحریک به د ده تر مشرۍ لاندې د هرې هغې هڅې هرکلی وکړي چې د طالبانو د جهادي فعالیتونو د ښه والي لپاره وي.
جمهور آژآنس:کابل