برگزاری ششمین نشست نمایندگان ویژه کشور‌های آسیای مرکزی و اتحادیه اروپا در مورد افغانستان

 

به گزارش خبرگزاری جمهور، وزارت امور خارجه تاجیکستان امروز پنجشنبه(18دلو) در اعلامیه‌ای گفته که نمایندگان ویژه‌ کشورهای آسیای مرکزی و اتحادیه اروپا در ششمین نشست خود در مورد افغانستان، تحولات سیاسی، اقتصادی و اجتماعی این کشور را بررسی کردند.

 

در اعلامیه‌ای آمده که این نشست دیروز چهارشنبه (17 دلو)، در شهر دوشنبه، پایتخت تاجیکستان برگزار شده است.

 

اعلامیه افزود: اشتراک‌کنندگان این نشست در مورد وضعیت حقوق‌‌ بشر در افغانستان، از جمله وضعیت زنان و دختران و چالش‌ها و تهدیدات امنیتی افغانستان نیز گفتگو کرده‌اند.

 

اتحادیه اروپا اعلام کرده است که ششمین نشست نمایندگان ویژه کشورهای آسیای مرکزی و اتحادیه اروپا برای افغانستان در دوشنبه پایتخت تاجیکستان برگزار شده است.

 

توماس نیکلاسون، نماینده ویژه اتحادیه اروپا برای افغانستان با سیروالدین محرالدین، وزیر امور خارجه تاجیکستان، دیدار کرده است. 

 

دو طرف بر اهمیت ثبات و امنیت منطقه تأکید کرده و راه‌های بالقوه برای مقابله با چالش‌های امنیتی و انسانی افغانستان را بررسی کردند.  

 

طبق این اعلامیه نشر شده افغانستان همچنان یک موضوع کلیدی برای کشورهای آسیای مرکزی است. 

 

گفتنی است که پس از خروج امریکا از افغانستان برخی کشورهای اوزبیکستان، قزاقستان و قرغیزستان، تماس‌های دیپلماتیک خود را با طالبان از سر گرفتند. قزاقستان و قرغیزستان طالبان را از فهرست سازمان‌های تروریستی حذف کرده‌اند.