معاون اداری طالبان و سفیر اوزبیکستان درباره‌ی توسعه روابط گفتگو کردند
سه شنبه ۴ جدی ۱۴۰۳ ساعت ۰۸:۰۶
مولوی عبدالسلام حنفی معاون اداری گروه طالبان با آیبیک عارف عثمانوف سفیر کشور اوزبیکستان دیدار کرده و روی توسعه روابط این گروه با آن کشور صحبت کرده است.
به گزارش خبرگزاری جمهور، ارگ تحت کنترل گروه طالبان بامداد امروز سه‌شنبه (4 جدی) در اعلامیه‌ای گفته که مولوی عبدالسلام حنفی معاون اداری این گروه با آیبیک عارف عثمانوف سفیر کشور اوزبیکستان در کابل دیدار کرده است.
آیبیک عارف عثمانوف سفیر اوزبیکستان در کابل از روابط امارت طالبان با کشورش ابراز خرسندی کرده و بر تقویت و توسعۀ روابط دو جانبه در عرصه‌های مختلف تأکید ورزیده است.
وی با بیان اینکه دولت اوزبیکستان خواهان گسترش روابط اقتصادی و تجارتی با گروه طالبان است، افزوده که تاجران و سرمایه‌گزاران کشورش در بخش‌های مختلف بخصوص ایجاد مراکز صحی، واردات ادویه‌جات، ایجاد فابریکه سمنت و خریداری و تجارت ذغال سنگ در افغانستان آمادۀ همکاری و سرمایه‌گذاری می‌باشند.
مولوی عبدالسلام معاون اداری طالبان با یادآوری از سفر اخیرش به اوزبیکستان و دیدار با مقامات عالی رتبۀ آن کشور، از علاقه‌مندی تاجران و سرمایه‌گذاران اوزبیکستان به تجارت و سرمایه‌گذاری در افغانستان ابراز خرسندی نمود.
حنفی همچنان بر توسعه و تقویت روابط این گروه با اوزبیکستان در عرصه‌های مختلف به‌خصوص تجارت و سرمایه‌گذاری تأکید کرده است.
کد مطلب: 178822
