جمهور - گروه طالبان و کشور‌های آسیای‌میانه در مورد تطبیق پروژه‌های خط آهن گفتگو کردند

گروه طالبان و کشور‌های آسیای‌میانه در مورد تطبیق پروژه‌های خط آهن گفتگو کردند

هیأت وزارت فواید عامه گروه طالبان که در نشست شورای ترانسپورت ریلی کشور‌های مشترک‌المنافع در اوزبیکستان شرکت کرده است با کشور‌های تاجیکستان، اوزبیکستان و قزاقستان در مورد تطبیق پروژه‌ای خط آهن گفتگو کردند.

به گزارش خبرگزاری جمهور، وزارت فواید عامه کشور، تحت کنترل گروه طالبان امروز شنبه (19 عقرب) با نشر اعلامیه‌ای گفته که هیأت این گروه در 81‌مین نشست شورای ترانسپورت ریلی کشورهای مشترک المنافع، در اوزبیکستان شرکت کرده است.

طالبان گفتند که هیأت این گروه دیدارهای دو جانبه با رؤسای خط آهن کشورهای قزاقستان، تاجیکستان و اوزبیکستان داشته‌ و روی تطبیق پروژه‌های خط آهن و افزایش حجم انتقالات اموال تجارتی و ترانزیتی از طریق خط آهن گفتگو کرده‌ است.

گفتنی است، بر اساس اعلام دفتر مطبوعاتی وزارت فواید عامه گروه طالبان، مولوی محمد اسحاق صاحب‌زاده، معین خط‌آهن این وزارت، ریاست هيأت طالبان را بر عهده داشته است.

خبرگزاری جمهور