سرمایه‌گذاران اوزبیکستانی در افغانستان سرمایه‌گذاری می‌کنند

شمار از تاجریان و سرمایه‌گذاران اوزبیکستانی با مولوی عبدالسلام حنفی معاون اداری گروه طالبان دیدار کرده و گفته که در بخش‌های مختلف در افغانستان سرمایه‌گذاری می‌کنند.

ارگ تحت کنترل گروه طالبان بامداد امروز دوشنبه(11 سرطان) در اعلامیه‌ی از قول  نادر رستموف سرمایه‌گذار اوزبیکستانی گفته که وی به ایجاد زمینۀ تجارت و سرمایه‌گذاری در بخش‌های مختلف و تأمین امنیت در حاکمیت طالبان اشاره کرد و افزود: همین امر باعث تشویق تاجران و سرمایه‌گذاران برای کار و فعالیت در این کشور شده است.

او گفته که تاجران و سرمایه‌گذاران اوزبیکستانی مایل‌اند با استفاده از فرصت پیش آمده در بخش‌های انرژی، نساجی، استخراج نفت و معادن، ایجاد کارخانه‌های تولیدی و زیرساخت‌ها، سرمایه‌گذاری نمایند.

مولوی عبدالسلام حنفی گفته که امارت طالبان خواهان توسعه روابط با کشورهای همسایه در همه زمینه‌ها خصوصاً تجارت و سرمایه‌گذاری می‌باشد و از تاجران و سرمایه‌گذاران کشورهای مختلف به‌خصوص همسایه‌ها می‌خواهد تا در بخش‌های مختلف در افغانستان سرمایه‌گذاری نمایند.

خبرگزاری جمهور