مقامهای تاجیکستانی در مورد امنیت مرزی با افغانستان، با جنرال مایکل کوریلا، فرمانده سنتکام ارتش امریکا، دیدار کرده اند.
به گزارش
خبرگزاری جمهور؛ فرماندهی مرکزی امریکا (سنتکام) میگوید که آماده است نیروهای امنیتی تاجیکستان را برای دفاع از مرزهای آن کشور آموزش دهد و تجهیز کند.
آقای کوریلا در سفر دو روزهاش به دوشنبه، با رییس جمهور و مقامات ارشد امنیتی تاجیکستان درباره مسایل مهم امنیتی، از جمله بهبود امنیت مرزهای این کشور گفتگو کرد.
جنرال کوریلا امنیت مرزهای تاجیکستان را حیاتی خواند و گفت: "مرزهای قوی تاجیکستان برای امنیت کل آسیای مرکزی حیاتی است."
در اعلامیه سنتکام آمده که کوریلا همچنین تصریح کرد که همکاری امنیتی با نیروهای امنیتی تاجیکستان بر مبارزه با تروریزم و عملیاتهای امنیتی مرزی متمرکز است.
حمایت سنکام از تاجیکستان شامل نصب حسگرهای زمینی، تجهیزات مخابراتی و وسایط گزمه برای مرزبانان تاجیکستان میشود.
جنرال کوریلا تاکید کرد که نیروهای ویژه امریکا در 20 سال گذشته تجربه وسیعی در مبارزه با تروریزم به دست آوردند و میتوانند این تجربه را با نیروهای مسلح تاجیکستان شریک سازند.
جنرال کوریلا به مقامات تاجیک اطمینان داد که کمک به تاجیکستان ادامه خواهد داشت. او گفت: "من به حاکمیت ملی و تمامیت ارضی تاجیکستان متعهد هستم."
این در حالی است که دولت تاجیکستان پس از تسلط طالبان بر افغانستان، از احتمال بروز نا امنی در مرز با افغانستان بارها ابراز نگرانی کرده است.
خبرگزاری جمهور- کابل