پس از حمله موشکی داعش به داخل خاک تاجیکستان، رهبران روسیه و تاجیکستان از طریق یک تماس تلیفونی در مورد امنیت مرزی با افغانستان گفتگو کرده اند.
به گزارش
خبرگزاری جمهور؛ امامعلی رحمان رییسجمهور تاجیکستان روز جمعه (23 ثور) از طریق تلیفون با ولادیمیر پوتین رییسجمهور روسیه گفتگو کرده است.
دفتر ریاست جمهوری روسیه اعلام کرده که موضوع این گفتگوی تلفنی افزایش فعالیت گروههای تروریستی در خاک افغانستان بوده است.
کرملین افزوده که در این گفتگوی تلفنی تاکید شد که ادارات ذیصلاح روسیه و تاجیکستان به همکاری فعال خود برای تأمین امنیت در مرز تاجیکستان و افغانستان ادامه دهند.
این در حالی است که روز پنجشنبه گذشته گروه داعش ویدیویی از حمله موشکی به خاک تاجیکستان از ولایت تخار افغانستان را منتشر کرد.
در این ویدیو دیده می شود که شاخه خراسان داعش هفت موشک را از ولسوالی خواجه غار ولایت تخار، در شمال افغانستان به سوی تاجیکستان شلیک کرده است.
مرکز رسانهای کمیته دولتی امنیت ملی تاجیکستان نیز تأیید کرد که چهار موشک دست ساز از نوع BM-1 به سوی این کشور شلیک شده است، اما گفت که این گلولهها در جریان درگیری بین طالبان و داعش به طور تصادفی به سوی این کشور پرتاب شده است.
گفتنی است که روسیه نگران امنیت مرزهای شرقی خود با افغانستان است و به همین دلیل یک پایگاه بزرگ نظامی را در تاجیکستان ایجاد کرده است. این پایگاه پس از ورود طالبان به کابل با تسلیحات مدرن مجهز شده است.
خبرگزاری جمهور- کابل