تاجیکستان و چین مانور نظامی در مرز با افغانستان اجرا می‌کنند

وزارت داخله تاجیکستان اعلام کرده که در پی راه اندازی یک مانور مشترک نظامی با چین، در مرز با افغانستان است.

به گزارش خبرگزاری جمهور؛ وزارت داخله تاجیکستان در یک اعلامیه گفته که در چارچوب توافقنامه همکاری بین وزارت امور داخله جمهوری تاجیکستان و وزارت امنیت عمومی جمهوری خلق چین، در حال آمادگی گرفتن برای انجام یک مانور مشترک نظامی در مرز با افغانستان است.

بر بنیاد اعلامیه این مانور در ولایت بدخشان تاجیکستان به منظور مبارزه هراس افگنی برگزار خواهد شد.

در اعلامیه زمان برگزاری این مانور مشخص نشده است؛ اما گفته شده که تجهیزات و هزینه‌های آن از سوی دولت چین آماده و پرداخت خواهد شد.

این در حالی است که دو هفته پیش کشورهای امنیت دسته جمعی به رهبری روسیه یک مانور مشترک نظامی شش روزه را در مرز تاجیکستان با افغانستان برگزار کردند.

هدف از این مانور نظامی نیز آمادگی برای هرگونه احتمال حمله گروه های تروریستی به تاجیکستان، اعلام شد.

پس از قدرت گرفتن طالبان در افغانستان، مقامات تاجیکستان نسبت به رویدادهای این کشور اظهار نگرانی دارند که مبادا گروه‌‎های تروریستی از افغانستان وارد خاک تاجیکستان شوند.

روسیه نیز اعلام کرده که گروه‌های تروریستی در مرز مشترک کشورهای آسیای میانه در حال آمادگی گرفتن برای ورود به این کشورها هستند.

خبرگزاری جمهور- کابل