خواهرزاده های امامعلی رحمان، وزیر صحت تاجیکستان را لت و کوب کردند

به گزارش جمهور، به نوشته روزنامه دیلی میل، در جریان فوت "قربان بی رحمانوا"، خواهر امامعلی رحمان، رییس جمهور تاجیکستان در سن ۶۴ سالگی و ۱۰ روز پس از بستری در یک شفاخانه خصوصی، خواهرزاده‌های رییس جمهور تاجیکستان "جمال‌الدین عبدالله‌زاده"، وزیر صحت و چند تن از مقام‌های صحی این کشور را مورد لت و کوب قرار دادند.
 
اگرچه علت مرگ این زن مشخص نشد اما داکتران می‌گویند وی به دلیل ابتلا به کرونا فوت کرد.
 
منابع محلی می‌گویند که وزیر صحت تاجیکستان به شدت مجروح شده است. همچنین تحقیقات اولیه برای بررسی این حمله انجام شده است.
 
متخصصان صحت و داکترانی از آلمان، روسیه و ازبیکستان برای تداوی خواهر رئیس جمهور تاجیکستان به ملاقاتش رفته بودند.
 
این حمله به وزیر صحت تاجیکستان در حالی صورت گرفته که هیچ یک از مقام‌های دولتی به این مساله واکنش نشان ندادند و معاون وزیر صحت نیز روز سه‌شنبه به سوالات پاسخ نداد.
 
کتک خوردن وزیر صحت تاجیکستان در پی تصمیم دولت امریکا برای تامین واکسین کرونا برای این کشور آسیایی صورت گرفت. روز دوشنبه ۱.۵ میلیون دوز واکسین مدرنای اهدایی امریکا از طریق کوواکس به تاجیکستان وارد شد.
 
فوت خواهر رئیس جمهور تاجیکستان در حالی رخ داده که چند هفته قبل هم مادر زن ۸۸ ساله‌اش بابت کووید-۱۹ درگذشت.
 
بر اساس گزارش رسانه‌های محلی، دست کم ۱۰ تن از اعضای خانواده رئیس جمهوری تاجیکستان به کرونا مبتلا شده‌اند.
 
مسئولان تاجیکستان می‌گویند، ۴۶۰ هزار تن از جمعیت ۹.۳ میلیون نفری این کشور تا اکنون واکسین کرونا دریافت کرده‌اند.
 
 
خبرگزاری جمهور- امور بین الملل