وزارت صحت عامه کشور گفته که دولت چین 400 هزار دوز واکسین کرونا به افغانستان کمک می‌کند.
به گزارش خبرگزاری جمهور؛ بر بنیاد اعلامیه وزارت صحت، وانگ‌یو سفیر چین در افغانستان دیروز یک‌شنبه (10 حوت) در دیدار با وحید مجروح سرپرست این وزارت، گفته کشورش 400 هزار دوز واکسین ضد کرونا کمک می‌کند.
به گفته او، کشورش بزودترین فرصت ممکن این واکسین را در اختیار وزارت صحت عامه افغانستان قرار خواهد داد.
دولت چین پیش از این 200 هزار دوز واکسین به دولت افغانستان تعهد کرده بود.
اخیراً هند 500 هزار دوز واکسین کرونا را به افغانستان کمک کرده بود که مرحله تطبیق آن هفته پیش آغاز شد.
وزارت صحت عامه گفته که نیروهای امنیتی، کارمندان صحی و خبرنگاران در اولویت برنامه تطبیق واکسین کرونا قرار دارند.
گفتنی است که دولت‌های هند و چین پیش از این در مرحله شیوع ویروس کرونا نیز با افغانستان کمک کرده‌اند.
خبرگزاری جمهور- کابل
