رئیس شورای عالی مصالحۀ ملی عازم تاجیکستان شد

داکتر عبدالله عبدالله رئیس شورای عالی مصالحۀ ملی کشور، صبح امروز دوشنبه (اول جدی) در راس یک هیات عالی رتبه، عازم دوشنبه پایتخت تاجیکستان شد.

به گزارش خبرگزاری جمهور؛ دفتر مطبوعاتی شورای امنیت ملی گفته که آقای عبدالله به سلسله‌‌ سفرهای منطقه‌ای خویش برای جلب حمایت از تلاش‌های صلح به دعوت رسمی جمهوری تاجیکستان عازم تاجیکستان شده است.

در این سفر رئیس شورای عالی مصالحه‌ی ملی با  امام‌علی‌رحمن رئیس جمهور، جناب قاهر رسول‌زاده صدراعظم، جناب محمد طاهر ذاکرزاده رئیس مجلس نمایندگان و جناب سراج‌الدین مهرالدین وزیر امور خارجۀ جمهوری تاجیکستان، در پیوند به روند صلح افغانستان و چالش‌ها و فرصت‌های پیش رو بحث و تبادل نظر می‌کند.

پیش از این، داکتر عبدالله عبدالله رئیس شورای عالی مصالحۀ ملی، به هدف جلب حمایت کشورهای منطقه از روند صلح افغانستان، به کشورهای پاکستان، ایران، هند، ازبیکستان و ترکیه سفر نمود و با رهبران این کشورها دربارۀ تلاش‌های صلح دیدار کرد.

خبرگزاری جمهور- کابل