اتمر به تاجیکستان رفت

محمدحنیف اتمر، سرپرست وزارت امور خارجه کشور، صبح امروز پنجشنبه (27 سنبله) در راس یک هیات بلندپایه دولتی عازم تاجیکستان شد.

به گزارش خبرگزاری جمهور؛ وزارت امور خارجه با نشر اعلامیه‌ای گفته که این سفر دو روزه به دعوت رسمی تاجیکستان انجام شده است.

در اعلامیه آمده که آقای اتمر در این جریان سفر با امام علی رحمان رییس جمهور، قاهر رسول‌زاده نخست‌وزیر، سراج‌الدین مهرالدین وزیر خارجه و سید مؤمن یتیم‌اوف رییس کمیته‌ی دولتی امنیت ملی تاجیکستان دیدار خواهد کرد.

طبق اعلام وزارت خارجه، بحث‌ها و مذاکرات روی تقویت هرچه بیش‌تر روابط دو کشور در بخش‌های امنیتی و مرزی، ترانسپورت، سرمایه‌گذاری، تجارت، ترانزیت و انرژی متمرکز خواهد بود.

حنیف اتمر را در این سفر شماری از مقامات دولتی، والیان و اعضای مجلس نمایند‌گان همراهی می‌کند.

خبرگزاری جمهور- کابل