خودکشی نافرجام یک وزیر تاجیکستان

 
به گزارش جمهور به نقل از بی بی سی؛ خدایار خدایارزاده، وزیر نقلیات تاجیکستان اقدام به خودکشی کرده است. بر اساس اطلاع دادستانی کل تاجیکستان این حادثه حوالی ساعت ۵ صبح امروز (سه‌شنبه‌، ۱۱ اوت/۲۱ اسد) در آپارتمانی در شهر دوشنبه که محل زندگی خانواده آقای خدایارزاده بوده، اتفاق افتاده است.
 
به گفته مقامات، در پی "ناسازگاری خانوادگی" این وزیر تاجیک با استفاده از چاقو اقدام به خودکشی کرده است. دادستانی کل تاجیکستان گفته که همسر و دو فرزند و عروس خانواده از حادثه خبر یافته و به وی کمکهای اولیه رسانده‌اند.

منابع رسمی گفته‌اند که وزیر نقلیات تاجیکستان در شفاخانه "استقلال" شهر دوشنبه، پایتخت، بستری است و پزشکان پس از عملیات، وضع سلامت اورا "مساعد" ارزیابی می‌کنند.

دادستانی کل تاجیکستان گفته که در رابطه با این قضیه پرونده جنایی باز شده و تحقیق آن ادامه‌ دارد.

برای نخستین بار است که اقدام به خودکشی یک وزیر تاجیک رسانه‌ای می‌ شود.

آقای خدایارزاده ۶۲ سال دارد و بیش از سه و نیم سال است که وزیر نقلیات تاجیکستان است. در گذشته او نماینده پارلمان تاجیکستان و رئیس ناحیه روشان ولایت بدخشان این کشوربود.