تاجیکستان در بخش‌های ترانزیت و انرژی با افغانستان همکاری می کند

محمداشرف غنی رییس جمهور کشور، شام روز گذشته (پنجشنبه ۱۸ جوزا) در شهر آستانه پایتخت قزاقستان با امام علی رحمان رییس جمهور تاجیکستان ملاقات کرد.
ابتدا، رییس جمهور تاجیکستان به خاطر حادثات اخیر تروریستی به دولت و مردم افغانستان تسلیت گفت و بر همکاری های مشترک منطقوی بر مبارزه علیه تروریزم تأکید کرد.
سران دوکشور در رابطه به تقویت و گسترش روابط دو جانبه و منطقه به ویژه همکاری های اقتصادی، تجارتی، امنیتی، مبارزه با تروریزم و کنترول سرحدات بحث و تبادل نظر کردند.
رییس جمهور تاجیکستان از برگزاری کنفرانس “پروسه کابل” تحت رهبری دولت افغانستان حمایت کرد و آن‌را آغازی برای تقویت همکاری های منطقوی و صلح دانست و تأکید ورزید که افغانستان با ثبات به نفع همه کشورهای منطقه می باشد.
رییس جمهور تاجیکستان گفت که ما آماده هستیم تا در عرصه های ترانزیتی به ویژه خط آهن قرغزستان- تاجیکستان الی شیرخان بندر و همچنان خط آهن چین و ایران همکاری نماییم.
در همین حال محمد اشرف غنی نقش تاجیکستان را در همکاری های اقتصادی و ترانیزیتی منطقه مهم خوانده گفت که افغانستان آمادگی های لازم برای تطبیق پروژه های بزرگ به خصوص پروژه کاسا یکهزار را دارد و کشورهای شامل این پروژه نیز کار را در این بخش آغاز نموده اند.
وی گفت که با عملی شدن پروژه کاسا یکهزار و سایر پروژه ها، همگرایی بیشتر میان افغانستان و کشورهای مسیر این پروژه ها شکل میگیرد و ما علاقمند اجرایی شدن پروژه های بیشتر می باشیم. او همچنان افزود که ما خواهان وارد نمودن بیشتر انرژی برق به قیمت مناسب از تاجیکستان به افغانستان هستیم.
رییس جمهور تاجیکستان گفت که کشورش افغانستان را در همه عرصه ها به ویژه در بخش انرژی همکاری میکند و تاجیکستان ظرفیت مناسب برای تولید سمنت را نیز داردد و دراین زمینه آماده است با افغانستان همکاری کند.
رییس جمهور تاجیکستان خاطرنشان کرد که کشورش علاقمند است تا بیست و پنجمین سال روابط دوستی افغانستان و تاجیکستان را در کابل تجلیل نماید و به همین منظور وزیر خارجه آن کشور به افغانستان سفر خواهد کرد.
روسای جمهور افغانستان و تاجیکستان بر تقویت و تحکیم مناسبات اقتصادی و تجارتی میان دو کشور تأکید کردند.
در این ملاقات محمدحنیف اتمر مشاور امنیت ملی کشور، داکتر محمدهمایون قیومی مشاور ارشد رییس جمهور در امور زیربناها، شاه‌زمان میوندی مشاور ارشد رییس جمهور در امور روابط عامه و ارتباطات ستراتیژیک، محمدشاکر کارگر نماینده خاص رییس‌جمهور در امور کشورهای مشترک‌المنافع و نجیب آقا فهیم رییس حقوق و معاهدات وزارت امور خارجه کشورنیز حضور داشتند.
خبرگزاری جمهور- کابل