ننګرهار کې یو پخوانی جهادي قوماندان وژل شوی

چارواکي وايي، نامعلومه وسله والو کسانو په ننګرهار ولایت کې یو پخوانی جهادي قوماندان په ډزو وژلی او د هغه ملګری یې ټپي کړی دی.
د جمهور آژانس د خبر له مخې پېښه تېره شپه د ننګرهار ولایت د ښېوې ولسوالۍ د کوز کنړ په عبدالخېلو سیمه کې رامنځ ته شوې ده.
د ننګرهار د والي ویاند عطاالله خوږیاڼی وايي، وژل شوی پخوانی جهادي قوماندان بهرام نومېږي، چې اصل د لغمان اوسېدونکی او دا مهال په ننګرهار کې اوسېده.
نوموړی زیاتوي، چې قوماندان بهرام په خپل شخصي موټر کې له سیمې د ښار په لور روان و، چې نامعلومه وسله والو پرې برید کړی دی.
خوږیاڼی زیاتوي، چې په برید کې قوماندان بهرام وژل شوی او د سنګر په نامه د هغه یو ملګری ټپي شوی دی.
د ننګرهار والي محمد ګلاب منګل د قوماندان بهرام پر مړينه خواشيني ښودلې او اړوندو امنيتي ارګانونو ته يې د پېښې د څېړلو امر کړى دى.
د دغه بريد مسووليت تر اوسه چا پر غاړه نه دى اخيستى.
دا په داسې حال کې ده، چې تېره ورځ د ښېوې تر څنګ په کامې ولسوالۍ کې نامعلومو وسله والو د دارالمعلمين يو ښوونکى وژلى و.
جمهورآژانس:ننګرهار