طالبانو لوګر کې برمته کړي څلور تنه قومي مشران خوشي کړل

سیمه ییز چارواکي وايي، وسله والو طالبانو په لوګر ولایت کې برمته کړي، څلور تنه قومي مشران بېرته خوشي کړي دي.
د جمهور آژانس د خبر له مخې طالبانو دوه میاشتې وړاندې د ازرې ولسوالۍ څلور تنه قومي مشران برمته کړي وو، چې تېره ورځ بېرته خوشي شوي دي.
دغه قومي مشران له حکومت سره د همکارۍ په تور د طالبانو له خوا نیول شوي، خو د ازرې ولسوال حمیدالله حمید وايي، هغوی تېره ورځ خوشي او خپلو کورونو ته ستانه شوي دي.
دغه څلور تنه قومي مشران عبدالستار، میرغوث الدین، عبدالهادي او حیات نومېږي، چې د ازرې ولسوالۍ د اکبر خېلو د سیمې اوسېدونکي دي.
د ازرې ولسوال زیاتوي، چې یاد قومي مشران د کومې معاملې پر اساس نه بلکې، د قومي شرانو په هلو ځلو راخوشي کړي دي.
خو د لوګر د ولایتي شورا غړي عبدالولي وکیل ویلي، چې د دې قومي مشرانو د خلاصون په بدل کې طالبانو ته یو میلیون افغانۍ ورکړل شوې دي.
هغه دا هم ویلي، چې طالبانو دغه راز د یادې سیمې پر خلکو شرط ایښی، چې د ملي اردو، ملي پولیسو او سیمه ییزه پولیسو له لیکو څخه دې خپل ځوانان راوباسي.
جمهورآژانس:لوګر