پاکستان هم د سولې هڅې کوي او هم ترهګر ساتي

په افغانستان کې د بهرنیو ځواکونو عمومي قوماندان جنرال جان نېکولسن وایي، پاکستان له یوې خوا د سولې د خبرو هڅې کوي او له بلې ځوا ترهګر ساتي.
د جمهور آژانس د خبر له مخې نېکولسن دغه څرګندونې د انډین ایکسپریس ورځپاڼې ته په مرکه کې او ویلي یې دي، پاکستان له یوې خوا د سولې خبرو ته د طالبانو د راوستلو هڅې کوي او له بلې خوا حقانیان لا هم په پاکستان کې پناهځایونه لري.
هغه زیاته کړې، چې د حقاني شبکه له دغه هېواد په آزاده توګه حملو ته دوام ورکوي، چې په وینا یې دا مسله ورته د اندېښنې وړ ده.
که څه هم نوموړي په قبایلي سیمو کې د ترهګرو پر وړاندې د پاکستان د ضرب عضب عملیات ستایلي، خو په وینا یې حقاني شبکه ترې خوندي پاتې شوه.
هغه زیاته کړې «د دغو عملیاتو په نتیجه کې د پاکستاني طالبانو په شمول ګڼ شمېر تروریستان افغانستان ته واوښتل چې افغان ځواکونه یې ځپي مګر حقانیان افغانستان ته رانغلل دوی لا هم مجبوره کړای شوي نه دي چې د پاکستان د عملیاتو په نتیجه کې افغانستان ته واوړي،د حقاني شبکه د پاکستان له خاورې څخه په افغانستان کې د افغان او امریکايي پوځیانو پر ضد عملیاتو ته دوام ورکوي.»
د نیکلسن په وینا طالبان او حقاني شبکه لا هم په پاکستان کې پناهځایونه لري او لا هم اجازه ورکول کېږي چې له خپلو پناهځایونو په افغانستان کې حملې وکړي.
د ناټو قوماندان نیکلسن زیاته کړې، چې په کابل کې تر ټولو غټې حملې د حقاني شبکه د پاکستان له خاورې تنظیموي.
نوموړي انډین ایکسپریس ته ویلي، په افغانستان کې د حقاني شبکه، طالبان، القاعده او لشکر طیبه سره مدغم کېږي او د دې معنا دا ده چې تروریستي ډلې د افغانستان له خاورې د اډې په توګه د هندیانو او امریکایانو پر ضد د حملو لپاره کار اخلي.
دی وایي، له همدې کبله کانګریس په ۲۰۱۵ م کال یوه لایحه تصویب کړه چې په هغه کې یې له پاکستان سره د امریکا مرستې د حقانیانو پر ضد د پاکستان له اقدام سره مشروطې کړې.
جنرال نیکلسن وویل«د امریکا دفاع وزیر اشتن کارتر ته مې سپارښتنه وکړه چې د پاکستان له لوري د دغه هېواد په خاوره کې د حقاني شبکې پر پناهځایونو کافي فشار نشته.»
باید وویل شي، چې په افغانستان کې د بهرنیو ځواکونو عمومي قوماندان جنرال جان نیکلسن دې ته ورته خبرې پرون /یکشنبه/ د امریکا این بي سي نیوز ته هم کړې دي.
جمهورآژانس:کابل