وسله والو په فراه کې ۱۱ تنه مسافر برمته کړي

د فراه د ولایتي شورا چارواکي وايي، وسله والو مخالفینو په دغه ولایت کې ۱۱ تنه مسافر له موټر نه ښکته او په نامعلوم لوري بېولي دي.
د جمهور آژانس د خبر له مخې دا خبره د فراه د ولایتي شورا مشر فرید بختور رسنیو ته کړې او ویلي یې دي، دغه پېښه تېره ورځ مازیګر مهال شپږ بجې د دې ولایت د بالابلوک ولسوالۍ د کنسک په سیمه کې رامنځ ته شوې.
نوموړي ویلي دغه مسافر د میرویس نیکه تراسنپورټي شرکت اړوند ۳۰۳ موټر کې له کابل څخه فراه ته په لاره و، چې په یاده سیمه کې د وسله والو مخالفینو له خوا برمته شوي او نامعلوم لور ته یې وړي دي.
د فراه د والي ویاند محمد ناصر مهري هم د پېښې پخلی کړی، خو په اړه یې نور جزیات نه دي ورکړي.
تر اوسه کومې وسله والې ډلې هم په دې اړه څه نه دي ویلي.
جمهورآژانس:فراه