د ضرب غضب عملیات د پاکستان داخلي مشکل و نه د حقاني شبکې پر ضد عملیات

افغان ولسمشر محمد اشرف غني یو ځل بیا د پاکستان پر پوځي پالیسۍ نیوکه وکړه، چې له ترهګرۍ سره په مبارزه کې دوه ګونی چلند کوي.
ښاغلی غني وايي افغانستان ۱۱ ځلې د پاکستاني طالبانو د مشر پر ضد عملیات کړي، خو د پاکستان له خوا هېڅ داسې سند نشته چې ثابته کړي پاکستان دې د حقاني شبکې او افغان طالبانو د مشرانو پر ضد عملیات کړي وي.
د جمهور آژانس د خبر له مخې ښاغلي غني دغه څرګندونې د پاکستان له جیونیوز تلوېزیون سره په مرکه کې کړې او ویلي یې دي، چې افغان حکومت له ترهګرۍ سره د مبارزې په برخه کې له پاکستان څخه عملي اقدامات غواړي.
ولسمشر په دغه مرکه کې ویلي« موږ ۱۱ ځلې د پاکستاني طالبانو د مشر ملا فضل‎الله پر ضد عملیات کړي، خو د پاکستان د ورته حملې یو ثبوت موږ ته راوښیۍ، پاکستان چې کوم عملیات په وزیرستان کې وکړل هغه یې خپل داخلي مشکل و، هېڅ داسې سند په لاس نه ‎لري چې ثابته کړي، پاکستان دې د حقاني شبکې او د افغان طالبانو د مشرانو پر ضد عملیات کړي وي.»
افغان ولسمشر دا هم وویل، چې په پاکستان کې د وسله وال مشران علني غونډې کوي بهرنیو هېوادونو ته په پاکستاني پاسفورټونو او د پاکستان له هوايي ډګرونو تګ راتګ کوي، خو په افغانستان کې داسې هېڅ بېلګه نشته ده.
ښاغلي غني وړاند ویلي« دا خبره څوک ردولی شي چې د طالبانو دفترونه په کوټه کې دي؟ تاسې ورشئ هلته له طالبانو سره خبرې وکړئ، که‎یې ادرس غواړئ، زه به‎یې درکړم، طالبان په ازاده توګه استخدام کوي، مالي او لوجېستیکي ملاتړ یې کېږي، موږ یوولس ځله پر فضل‎الله بمباري کړې، دا چې هغه ۷ ساوې لري، زما مشکل نه‎دی، ایا تاسو د حقاني شبکې، ملا عمر او ملا منصور پر ضد د کومې حملې بېلګه راښودلی شئ؟ منصور له کراچۍ څخه د پاکستان په پاسپورټ سفرونه کول، آیا فضل‎الله په افغاني پاسپورټ له کابل، هرات یا کندهاره سفر کوي؟ وګورئ، کله چې هغوی ټپيان شي، درملنه‎یې کېږي او په اسلام‎اباد کې غونډې جوړوي»
ولسمشر محمد اشرف غني له جیو نیوز سره په مرکه کې ویلي، د پاکستان او افغانستان ولسونه سره وروڼه دي، خو له حکومت سره به‎یې هغه مهال اړیکې ښې شي چې پر خپلو ژمنو عمل وکړي.
ښاغلي غني زیاته کړې«لومړی قدم دا دی چې دوی باید د معلومو ترورېستانو په لټه کې شي، دا معلومه خبره ده چې که دوی د ترهګرو پر وړاندې عملي اقدام ونه‎کړي، موږ باور نه‎کوو، دویم قدم دا دی چې دوی باید د څلور اړخیزو غونډو ژمنې عملي کړي چې هغه د سوله خوښوونکو او جګړه خوښوونکو مخالفینو موضوع ده، هغه مخالفین چې سوله نه‎غواړي باید له پاکستانه بهر کړای شي.»
ولسمشر په خپله دې مرکه کې ویلي، د افغانستان بهرنۍ پالېسي مستقله ده او له هر هېواد سره‎یې اړیکې په بل هېواد بد اغیز نه‎شي کولای.
جمهورآژانس:کابل