پاکستان له موږ نه مرستې تر لاسه کوي، خو په همدې پیسو زموږ دپلوماتیکي هڅې ناکاموي

د امریکا د کانګرس په استماعیه غونده کې پر پاکستان سختې نیوکې وشوې، او دغه هېواد د ترهګرۍ پر وړاندې مبارزه کې پر دوه مخۍ تورن شو.
د جمهور آژانس د خبر له مخې د کانګرېس د تېرې ورځ په استماعیه غونده کې وویل شول، چې پاکستان له یوې خوا د ترهګرۍ پر وړاندې مبارزه کې ځان د امریکا ملاتړی بولي، خو له بلې خوا د امریکا نه په تر لاسه شویو مرستو په سیمه کې د امریکا د دپلوماتیکو هڅو ناکامولو ته یې مټې بډوهلې.
د یادې غونډې مشر سالمون په پیل کې وویل، چې امریکا د ۲۰۰۱ کال د سپټمبر د ۱۱ مې نه وروسته پاکستان ته میلیونونه امریکايي ډالر ورکړي دي، خو په وینا یې نن له پنځلسو کلونو وروسته هم د پاکستان پوځ او استخباراتي ادارې د ترورېستي ادارو سره اړیکې لري.
هغه زیاته کړه«د مرستو په پرتله په دغه سیمه کې د امنیت د ټینګولو له پاره ډېر لږ اقدامات شوي دي، موږ ته پکار ده، چې د امریکا په هدفونو، توقعاتو او په مرستو ورکولو د سره نظر واچوو.»
سالمون وړاندې وایي« پاکستان ادعا کوي چې د ترهګرۍ په خلاف په جگړې کې زمونږ ملگرې هیواد دی. خو تاریخ ښیی چې پاکستان زمونږ نه مالي مرستي او وسلې تر لاسه کوي او بیا په دغو پېسو په سیمه کې زمونږ دپلوماتیکي هڅې ناکاموي.»
نوموړی زیاتوي، چې ډېری کارپوهان په دې باور دي، چې پاکستان د ځینو ترهګرو ډلو په خلاف جنګ نه کوي او په خاصه توګه د هغو ډلو په ضد چې دوي ترینه په هند او افغانستان کې د خپلو ګټو لپاره کار اخلي.
د هغه په وینا پاکستان ان د اسامه بن لادن په قضیه کې د امریکا ملګریتا نه وه کړي او تر اوسه پورې یې ډاکټر شکیل افریدی په بند کې ساتلې دی.
باید وویل شي دا خبره نه یوازې کارپوهان کوي، بلکې لوړ پوړي پاکستاني چارواکو هم اعتراف کړی دی، چې پاکستان د ښو او بدو وسله والو پر پالیسۍ ولاړ دی.
د پاکستان د ملي امنیت او بهرنیو اړیکو سلاکار سرتاج عزیز نېږدې درې اوونۍ وړاندې په اسلام آباد کې وویل، چې پاکستان لا هم د ښو او بدو طالبانو پر پالیسۍ باوري دی.
د امریکا د سنا یو بل غړی شرمن هم وايي، چې د پاکستان پخواني ولسمشر جنرال مشرف هم په خپله یوه مرکه کې ویلي دي، چې به د هغه ډلو ملاتړ ته دوام ورکوي چې په هند کې جنګیږي.
ده په خپلو خبرو کې وویل« هغه خلک چې غواړي پاکستان ته دي مالي مرستې دوام ولري هغوی دي باید دې ته قانع کونکی دلیل ولري، چې ایا پاکستان د امریکا دوست دی که دښمن، نو پکار ده چې مونږ هغه ملک ته مالي مرستې نه ورکوو چې مونږ پرې نه پوهیږو چې هغه زمونږ دوست دی که دښمن.»
دغه راز یادې غونډې ته په افغانستان کې د امریکا پخواني سفیر زلمي خلیل زاد ته هم د پاکستان په ضد د شاهد په توګه بلنه ورکړل شوې وه.
ښاغلي خلیلزاد په خپلو خبرو کې و ویل، چې ۲۰۰۱ کال د سپټمبر د ۱۱ مې نه وروسته پاکستان په پېل کې د طالبانو په خلاف د امریکا سره مرسته کړې ده او د القاعدې ځینې مهم کسان یې هم نیولي دي.
خو کله چې د افغانستان په هکله د پاکستان په رول خبره وشي، نو د هغه په وینا پاکستان د ټرورزم مرسته کونکې هیواد دی.
نوموړی وايي په دې کې هېڅ شک نشته چې د پاکستان پوځ او استخباراتي اداره آي ایس آي د حقاني شبکې ملاتړ کوي او له امریکا نه وغوښتل چې د پاکستان په خلاف دې اقدامات وکړي.
خلیلزاد وویل«کله چې یو څوک غواړي بل کس د ناجایزه عمل نه منع کړي، نو ورته سزا ورکوي یا داسي څه کوي چې هغه ته مشکلات پیدا کړي. پکار ده چې مونږ پاکستان ته دا ووایو چې تاسو چې څه کوئ د هغې نه لاس واخلئ کنه مرستې به بندې شي.»
باید وویل شي، په دغه غونډه کې له امریکا دا هم وغوښتل شول، چې د پاکستان د لوړ پوړو پوځي چارواکو پر سفرونو بندیز ولګولي، ځکه د دوی په وینا، د پاکستان پوځ او استخباراتي اداره، د حقاني، القاعده او نورو ترهګرو ډولو ملاتړ کوي.
جمهورآژانس:کابل