ولسمشر نه باید د سولې په لاس ورغلی فرصت له لاسه ورکړي

د حزب اسلامي مشر انجینر ګلبدین حکمتیار په خپل اختریز پیغام کې ویلي په حکومت کې د ګډون شوق نه لري، خو له ولسمشر غني نه غواړي، چې د سولې په برخه کې په لاس راغلی فرصت له لاسه ورنکړي.
د جمهور آژانس د خبر له مخې ښاغلي حکمتیار په دې پیغام کې ټولو هېوادوالو ته اختر مبارکي ویلي او د هېواد د سولې او ثبات له پاره یې دعا کړې ده.
نوموړي له افغان ولس نه غوښتي، چې د بهرنیو ځواکونو وتلو، د ستونزو د حل او جګړې ته د پای ټکي اېښودلو په برخه کې په خپلو کې سره یو او سلا شي.
هغه زیاته کړې«باید ژمنه وکړو، چې وروسته له دې د قدرت د لېږد په پروسه کې باید یو څاڅکی وینه هم تویې نه شي او نه هم یوه مرمۍ فیر شي.»
ښاغلي حکمتیار په ټینګار سره له ولسمشر غوښتي، چې د یوې عادلانه او ډاډمنې سولې له پاره په لاس راغلي فرصت له لاسه ورنکړي او زیاته کړې یې ده«لفطآ اجازه مه ورکوي، چې د سولې پروسه د هغه کسانو له خوا یرغمل شي، چې له جګړې تغذیه کېږي او د نورو د ګټو له پاره نیابتي جګړې پر مخ وړي، لاس یې د افغانانو په وینو سره دي، د بهرنیو ځواکونو د مټ پر زور قدرت ته رسېدلي او نه غواړي قدرت له لاسه ورکړي، د هغوی له پاره دا مهمه نه ده، چې په جګړه کې افغانان وژل کېږي، او کورنه او هېواد یې ورانېږي.»
په ورته وخت کې حکمتیار د امریکا له ولسمشر بارک اوبا نه غوښتي، چې د جګړې د پلویانو په مشوره ونه کړي، ځکه په وینا یې هغوی په افغانستان کې د بهرنیو ځواکونو او جګړې پر دوام ټینګار کوي.
نوموړي ویلي امریکا باید افغانستانه ووځي او افغانانو ته فرصت ورکړي، چې خپلې ستونزې په خپلو لاسونو خپله حل کړي او امریکا باید د افغانانو خپل منځي پرېکړو او توافق څخه ملاتړ وکړي.
د حزب اسلامي مشر وايي«ټولو ته ډاډ ورکوم، چې حزب اسلامي د سولې غوښتونکی دی، د یوې باغزت او ډاډمنې سولې، د داسې سولې، چې د بهرنیو له منځګړیتوب او داخلت پرته د بین الاافغاني مذاکراتو پر اساس وي، د ځان له پاره هېڅ نه غواړم.»
ښاغلي حکمتیار په دغه پیغام کې زیاته کړې، چې د سولې او پخلاینې لاس یې و ټولو ته وړاندې کړی او غواړي وسله والو رقابتونو د سیاسي او د فکر جوړونې له لارې د پای ټکي کېږي.
ده ویلي، غواړي په هېواد کې له دولتي امنیتي ځوانو پرته هېڅ بهرنی وسله وال ځواک، ملېشې او اربکیان چې په سیاسي او قومي ډلو پورې تړلي وي، شتون ونه لري.
هغه وايي، حزب اسلامي په افغانستان کې د یوه ارګ غوښتونکی دی نه د دو ارګونو، او په وینا یې هېواد باید یو ولسمشر ولري نه ده، او دغه راز د موازي حکومتونو او د قدرت ځانګړې جزایر له منځه یووړل شي.
حکمتیار پر خپلو وسله والو غږ کړی، چې پر افغان امنیتي ځواکونو له بریدونو لاس واخلي خو په وینا یې له خپل ځان څخه د دفاع حق لري.
هغه یو ځل بیا ویلي، چې په حکومت کې د ګډون شوق نه لري او یوازې هغه وخت به حکومت کې ښايي ګډون وکړي، چې خپل ایماني مسؤولیت له مخې وکولای شي د خلکو او هېواد خدمت وکړي.
جمهورآژانس:کابل