د ترهګرو حامیان ورو ورو د انزوا خوا ته ځي

د افغانستان د ملي امنیت سلاکار محمد حنیف اتمر وايي، د ترهګرو حامیان له سخت انتخاب سره مخ شوي، ځکه دوی یو انتخاب لري، یا به له ترهګرۍ سره د مبارزې په اړخ کې درېږي، یا هم له ترهګرو سره.
د جمهور آژانس د خبر له مخې ښاغلي اتمر دغه څرګندونې نن د چین هېواد له لوري افغان حکومت ته د میلیونو ډالرو په ارزښت د پوځي مرستې د سپارلو په مراسمو کې وکړې.
چین له افغانستان سره د لومړي ځل لپاره نظامي مرستې وکړې، چې پکې د انتقالاتي طیارو په شمول، وسلې، تجهیزات، مهمات، لوژستيکي وسایل او نظامي وسایط شامل دي.
د ملي امنیت سلاکار محمد حنیف اتمر له افغانستان سره د چین دا نظامي مرسته ترهګرو او د ترهګرو ملاتړ کوونکو ته دا پيغام ورکوي، چې چین د ترهګرۍ په ضد جګړه کې د افغانستان په څنګ کې ولاړ دی.
هغه وویل«د چین دا مرسته د ترهګرو حامیانو ته دا واضح پيغام ورکوي، چې دوی یو انتخاب ولري، یا د افغانستان حکومت، ناټو د قاطع ملاتړ ماموریت، د سیمې د هیوادونو په څنګ کې له ترهګرۍ سره په مبارزه کې ودریږي او یا هم د ترهګرو په څنګ کې، دوی له سخت انتخاب سره مخ شوي.»
ښاغلي اتمر په خپلو خبرو کې دا هم وویل، چې د چین نننۍ نظامي مرستې، پدې وروستیو کې د هند، روسیې او د ناټو نظامي ملاتړ د ترهګر حامیان منزوي کوي او ورو ورو د انزوا خواته ځي.
د ملي امنیت سلاکار وايي، چین او افغانستان له ګډ دښمن سره مخ دي چې ترهګري ده او په وینا یې دا چې ترهګر دوست نه لري، همداسې به د ترهګرو حامیان هم نور دوستان و نه لري.
په ورته وخت کې په کابل کې د چین سفیر یاو جینګ و ویل د چین دا نظامي مرستې له افغانستان سره د پراخو اړیکو برخه دي او دا چې افغانستان د انتقال په مهم پړاوو کې دی، نو چین ځکه دا مرستې کړي دي.
باید وویل شي، چې د چین دا نظامي مرستې د چین او افغانستان ترمنځ د لاسلیک شوې موافقتنامې په اساس شوي دي او ژر به چین افغان پولیسو ته مجهز سکنرونه هم ورکړي.
د چین دوهمه نظامي جوپه د مرستو به د اګسټ په میاشت کې افغانستان ته ورسیږي.
جمهورآژانس:کابل