پر افراطي ډلو زیات فشار راوستل ښايي تروریستي حملې زیاتې کړي

د پاکستان د لومړي وزیر د بهرنیو اړیکو سلاکار سرتاج عزیز وايي، که په پاکستان کې پر وسله والو ډلو زیات فشار راوستل شي، ښايي تروریستي بریدونه زیات کړي.
د جمهور آژانس د خبر له مخې عزیز چې تېره ورځ اسلام آباد کې خبري غوندې ته خبرې کولې وویل، چې پر افراطي ډلو زیات فشار راوستل معکوسه نتیجه لري، او په دې مبارزه کې د پرمختګ له پاره باید له احتیاطه ډک خو جدي ګامونه باید واخستل شي.
نوموړي ویلي، زیات فشار او د معکوسې نتیجې اخیستل یو خطر دی ځکه چې په پاکستان کې یوازې یوه ډله نه ده چې مبارزه ورسره کېږي.
هغه زیاته کړې« واضح ده چې د معکوسې نتیجې اخیستل یو خطر دی ځکه په پاکستان یوازې یوه ډله نه ده چې مبارزه ورسره کوو، موږ د پوځي مبارزې ترڅنګ، د زیاتو افراطي ډلو پر ضد استخباراتي جنګ هم پيل کړی.»
سرتاج عزیز پر پاکستان د نړیوالې ټولنې دا نیوکې هم رد کړ چې د حقاني شبکې د فعالیت بندولو لپاره یې کافي هڅې نه دي کړې او ټینګار یې وکړ، چې هېواد یې له تروریزم سره په مبارزه کې د پام وړ لاس ته راوړنې لري.
نوموړی وايي، د ترهګرۍ پر وړاندې مبارزه کې پرته له دې چې د ښو او بدو طالبانو ترمنځ توپير وکړي پر مخ روان دی او ښې لاس ته راوړنې لري.
باید وویل شي سرتاج عزیز د پاکستان له خوا د ښو او بدو طالبانو د نه توپیر خبره پر داسې مهال کوي، چې تر دې خبرو دوه ورځې وړاندې یې ویلي و، چې پاکستان لا هم پر ښو او بدو طالبانو باور لري.
عزیز د تېرې چهارشنبې ویلي، چې حکومت یې اوس هم طالبان په ښو او بدو وېشي او هڅه کوي، چې ښه طالبان له افغان حکومت سره د سولې خبرو ته حاضر کړي.
جمهورآژانس:کابل