رپوټونه وايي، پاکستاني پولیسو له ډېورنډ کرښې پورې غاړې په خیبرپښتونخوا په پېښور ښار کې ۳۴۰ تنه افغان کډوال نیولي دي.
د جمهور آژانس د خبر له مخې د خیبرپښتونخوا د پولیسو یوه مشر عباس مجید ویلي دغه کډوال یې د تېرو تر دریو ورځو په ترڅ کې د پېښور ښار له بېلا بېلو سیمو څخه نیولي دي.
ده زیاته کړې، چې پولیسو د غیرې قانوني کډوالو د نیولو عملیات پیل کړي، چې تر اوسه پورې ۳۴۰ تنه افغانان په کې نیول شوي دي.
نوموړی وايي، نیول شویو کډوالو قانوني اسناد نه درلودل او دا عملیات به د هغه افغان کډوالو پر وړاندې چې قانوني اسناد ونه لري دوام وکړي.
دا په داسې حال کې ده، چې وړمه ورځ د پاکستان د لومړي وزیر نوازشریف ځانګړي استازي فاطمي ویلي و، چې پاکستان نور په خپله خاوره کې افغان کډوال نه شي زغملی.
جمهورآژانس:کابل