د افغانستان یوه لوېشت خاوره به هم پاکستان ته ور پرې نه ږدم

د ولسمشر لومړی مرستیال جنرال عبدالرشید دوستم وایي، که پاکستان په تورخم کې وروستي جنجالونه د خبرو له لارې حل نه کړي نو پر وړاندې به یې پوځي اقدام وکړي.
د جمهور آژانس د خبر له مخې ښاغلي دوستم چې تېره ورځ په فاریاب کې خپلو پلویانو ته د وینا پر مهال وویل اوس د دې وخت رارسېدلی، چې ټول ملت د پاکستان پر وړاندې یو موټی شي.
ښاغلي دوستم په تورخم کې د جګړې پر مهال د افغان ځواکونو مېړانه او مورال وستایله او پاکستان یې د افغانستان د ازلي دښمن په نوم یاد کړ.
نوموړي زیاته کړې، چې افغان حکومت به هېڅکله هم له پاکستان سره په دې موضوع معامله ونه کړي او یوه لوېشت خاوره به هم پاکستان ته پرې نږدي.
دغه راز د افغان ولسمشر لومړي مرسیتال وايي، افغان ولس او حکومت نور باید د دغه هېواد پر دروغجنو ژمنو ونه غولېږي.
ده په خپلو خبرو کې ژمنه وکړه، چې که اړتیا شي، نو زرګونه پلویان به یې د افغان ځواکونو په لیکو کې د هېواد په هره برخه کې د امنیت په ساتلو کې برخه واخلي.
جنرال دوستم دغه څرګندونې پر داسې مهال کوي، چې دا مهال د تورخم دروازه د خلکو او موټرو پر مخ خلاصه شوې او د ستونزې د حل له پاره ټاکل شوې یو افغان پلاوی اسلام آباد ته سفر وکړي.
جمهورآژانس:کابل