پاکستان غواړي افغانستان له هند سره هېڅ اړیکې ونه لري

مخکنی افغان ولسمشر حامد کرزی وايي، افغانستان به هېڅ کله د پاکستان دا غوښتنه ونه مني، چې غواړي، افغانستان له هندوستان سره هېڅ ډول اړیکې ونه لري.
د جمهور آژانس د خبر له مخې ښاغلي کرزي ویلي افغانستان یو خپل واک هېوادی دی او باید له نورو هېوادونو سره یې پر اړیکو ځینې نور هېوادونه اندېښمن او خنډ نه شي.
ښاغلي کرزي د بي بي سي اردو څانګې سره په مرکه کې د پاکستان چارواکو او سیاسیون هغه ادعا هم په کلکه رد کړې، چې ویلي یې و، په تورخم کې د شوي کړکېچ تر شاه د هندوستان لاس دی.
ده په دغه مرکه کې ویلي«افغانستان یو خپلواک هېواد دی، هېڅ وخت د نورو په لاسونو نه لوبېږي، دا د هغه څه له وجې شوي، چې پاکستان یې له ډېره وخته د ډېورنډ په فرضي کرښه تر سره کوي، او زموږ خلک ترې ناراضه دي، او د دغه نارضیتوبونو له امله دغه څه رامنځ ته کېږي.»
پخواني ولسمشر د چابهار بندر په اړه د دې پوښتنې په ځواب کې چې ایا ښه به نه وه، په دغه بندر کې د افغانستان، ایران، او هند سربېره پاکستان هم وای وویل، چې پاکستان خپله نه غوښتل چې په دغه بندر کې شریک شي.
ښاغلي کرزي زیاته کړې، پاکستان غواړي، چې افغانستان دې له هندوستان سره هیڅ اړیکې ونه لري، ورسره دې تجارت نه کوي او هندوستان دې د افغانستان له لارې منځني اسیا هيوادونو ته لاره نه لري، خو په وینا یې د پاکستان دا غوښتنه افغانستان ته د منلو وړ نه ده.
نوموړي د دغه پوښتنې په ځواب کې چې پاکستان ولې د افغانستان او هند تر منځ له اړیکو ناخوښي ښيي وویل، چې پاکستان بې ځایه دا اندېښنه لري.
هغه زیاته کړه، چې که پاکستان دا مني، چې افغانستان یو خپلواک او آزاد هېوادی دی، نو بیا چې پاکستان له هند سره خبرې اترې کوي، نو بیا یې افغانان ولې ورسره ونه کړي.
ښاغلي کرزي«افغانانو د خپل هېواد د ازادۍ او خپلواکۍ له پاره بې شماره قرباني ورکړې او په دې لار کې یې نه انګرېز منلی، نه روس او د ننۍ امریکا سره ګوری چې څه کېږي، نو داسې یو ملت چې هغه پرته له ازادۍ نور هېڅ نه دي لرلي، او بیا پاکستان راشي موږ ته و وايي، چې له هندوستان سره اړیکې مه ټینګوی، ولې اړیکو ورسره ونه لرو؟ هند زموږ سره مرستې کوي همدا اوس زموږ زرګونه ځوانان هندې په زده کړو بوخت دي، هغوی په بنسټیزو پروژو کې راسره مرسته کوي، او تر ټول وړاندې دا چې هند له افغانستان سره د زړه نه او ريښتینې دوستي کوي او غواړي یې، پاکستان دې هم د زړه له تله زموږ سره دوستي وکړي.»
هغه وايي، د پاکستان له ولس نه مننه کوي، چې له افغان کډوالو سره یې ښه وخت تېر کړی خو په وینا یې افغانان په یوه برخه او یو سیاست څخه په دې برخه کې ناراضه دي او هغه دا چې د پاکستان نظام غواړي افغانستان تر خپل اغېز لاندې وساتي.
جمهورآژانس:کابل