ولسمشرغني له خپل ایراني سیال او د هند لومړي وزیر سره ولیدل

افغان ولسمشر محمد اشرف غني د ایران له ولسمشر ډاکتر حسن روحاني او د هند له لومړي وزیر نریندرا مودي سره په تهران کې وکتل.
د جمهور آژانس د خبر له مخې دغه کتنه چې تېره ورځ په جلا جلا ډول تر سره شوه، په کې له یادو هېوادونو سره د افغانستان د اړیکو پر غښتلتیار او یو لړ نورو مهمو موضوعاتو خبرې اترې وشوې.
د ایران ولسمشر ښاغلي غني ته د ښه راغلاست او دواړو هېوادونو تر منځ د اړیکو د ټینګتیا تر څنګ و ویل، چې د ایران امنیت او ثبات د افغانستان په امنیت او ثبات متکي دی.
ښاغلي روحاني زیاته کړه، چې د افغانستان د بې ګناه خلکو وینې بهوي خدای تعالی ته د نږدېوالي ادعا نشي کولای او له دې لارې خپل اعمال توجیه کړي.
دغه راز نوموړي په خپلو خبرو کې د هریرود حوزې د اوبو په برخه کې اندښنه وښوده او د دې تر څنګ یې په ایران کې د مېشتو افغان کډوالو د ستونزې د حل له پاره د یوې لارې چارې د لټولو غوښتنه وکړه.
افغان ولسمشر محمد اشرف غني په خپلو خبرو کې وویل، چې د هریردو حوزې تاریخي اسناد مطالعه شوي او د دغه ستونزې د حل له پاره یې یوه کاري کمېټه ټاکلې، چې له پارلمان سره مشورې وروسته به یو پلاوی وټاکل شي تر څو په دې اړه له ایران سره خبرې وکړي.
ولسمشر د کډوالو په اړه وویل، چې د کډوالو د عالي شورا د کډوالو چارو وزارت توظیف کړی دی، تر څو په ایران کې د افغان کډوالو دقیق ارقام سروې کړي او د هغو په رڼا کې تصمیم ونیول شي.
ښاغلي غني زیاته کړه«موږ په ایران کې د افغان کډوالو د حضور د قانونمند کېدو غوښتونکي یوو، تر څو د هغوی حقونه تامین شي.»
افغان ولسمشر وړاندې و وویل«زموږ د اړیکو د پیاوړتیا او د انکشاف اصولو څخه یو سرحدونه او د هېواد امنیت دی او زموږ توقع د تهدید امیز عناصرو په هکله د ګډ سیاست لرل دي، زموږ خلک تل د دوست او دښمن د تعریف په هکله د وضاحت غوښتونکي دي او افغانستان د ایران په څېر سره حدود او خطونه لري. د هېواد جمهور رئیس وویل، د افغانستان د بهرني سیاست اساس سیمه ییزې همکارۍ دي.»
دغه راز ولسمشر غني او د هند لومړي وزیر نریندرا مودي د اړیکو د پیاوړتیا مخصوصاً د ګډې اقتصادي همکاریو او له سیمه ییزې او نړیوالې ترهګري سره د مبارزې په هکله بحث وکړ.»
ښاغلي ولسمشر د هند هېواد له همکاریو خصوصاً په امنیتي برخه او د افغانستان امنیتي او دفاعي ځواکونو ته د هلیکوپترو د برابرولو له امله قدرداني وکړه او له افغانستان سره یې په بېلابېلو برخو کې د همکاریو د ادامې غوښتنه وکړه.
په ورته وخت کې د هند لومړي وزیر نریندرا مودي و ویل، هغه د خپل حکومت امنیتي برخه توظیف کړې چې د افغانستان امنیتي او دفاعي ځواکونو ته د ډېرو هلیکوپترو د برابرولو لارې ولټوي.
افغان ولسمشر د خپلو خبرو په پای کې زیاته کړه، چې زیربنایي لوی پروژې چې هند د هغه په جوړولو کې همکاري کړې لکه سلما بند او د ملي شورا ودانۍ ګټه اخیستنې ته سپارل شوې او د دې همکاریو تداوم د دواړو هېوادونو تر منځ د همکاریو د پراختیا لامل کېږي.
جمهورآژانس:کابل