ننګرهار کې طالبانو او داعش تر منځ جګړه شوې

چارواکي وايي، په ننګرهار ولایت کې د وسله والو طالبانو او داعش وسله والو تر منځ نښته کې له دواړو لورو ۳۱ تنو ته مرګ ژوبله اوښتې ده.
د ننګرهار ولایت له مطبوعاتي دفتره خپره شوې خبرپاڼه کې راغلي، چې دغه نښته د اچین ولسوالۍ په کرکرۍ سیمه کې رامنځ ته شوې.
سرچینه وايي، د وسله والو مخالفینو په دې خپل منځي جګړه کې ۱۵ داعش او درې طالب وسله وال وژل شوي او دغه راز ۶ داعش او پنځه وسله وال ټپیان شوي دي.
خبرپاڼه زیاتوي، چې په جګړه کې دوه داعش وسله وال هم د طالبانو له خوا ژوندي نیول شوي دي.
تر اوسه طالبانو او داعش په دې اړه څه نه دي ویلي.
دا په داسې حال کې ده، چې تېره ورځ د ننګرهار ولایت د خوږیاڼو ولسوالۍ د وزیرو په سیمه کې د سیمه ییزه پولیسو او طالبانو تر منځ نښته کې د دریو قوماندانو په ګډون ۹ وسله وال وژل شوي او یو شمېر نور ټپیان شوي دي.
په دې نښته کې یو سیمه ییز پولیس هم وژل شوی او دوه نور ټپیان شوي دي.
جمهورآژانس:ننګرهار