ننګرهار کې ۳۲ داعشیانو ته مرګ ژوبله اوښتې

د ننګرهار امنیتي چارواکي وايي، د افغان ځواکونو په هوايي برید کې د داعش د روزنې یو مرکز په نښه شوی او ۳۲ تنو ته یې مرګ ژوبله اوښتې.
د جمهور آژانس د خبر له مخې دغه برید تېره ورځ سهار د افغان هوايي ځواک له خوا د ننګرهار د اچین ولسوالۍ په مامند او مست بابا تنګي په سیمه کې شوې.
د ننګرهار د امنیه قوماندانۍ ویاند حضرت حسین مشرقیوال وايي، هوايي برید په یادو سیمو کې د داعش د زده کړو او ټرننګ پر یوه مرکز شوی دی.
نوموړي وویل، چې په دغه برید کې ۲۱ داعش وسله وال وژل شوي او ۱۱ تنه نور یې ټپیان شوي دي.
مشرقیوال زیاتوي، چې په وژل شویو کسانو کې یو د داعش قوماندان چې په سړي تښتونو کې یې هم لاس درلودل شامل دی.
د ننګرهار امنیه قوماندانۍ ویاند وایي په دغه برید کې د داعش دغه ټرېننګ مرکز په بشپړه توګه له منځه وړل شوی دی.
جمهورآژانس:ننګرهار