د ملارسول پلویانو د ملا منصور پر وړاندې جنګ اعلان کړ

د ملا محمدرسول په مشرۍ د وسله والو طالبانو ډلې د ملا اختر محمد منصور د پلوي طالبانو پر وړاندې د جنګ اعلان کړی دی.
د جمهور آژانس د خبر له مخې په هغې ویډیو کې چې په رسنیو کې خپره شوې د ملا محمد رسول پلوي طالبانو په بادغیس کې سره راټول شوي او د جنګ اعلان یې کړی.
د دغه ډلې مشر ملا عبدالغفار طوفان دی او وايي دوی ځکه له ملا اختر محمدمنصور سره نه دېږي، چې په وینا یې هغه د پاکستان د څارګرې ادارې آی اېس آی په لاس کې دی او د ډېرو طالب مشرانو په مړینه کې لاس لري.
ملا طوفان ویلي پاکستان هڅه کوي څو په افغانستان کې ورور وژنې ته لمن ووهي او په دې کار کې ملا منصور د هغوی مرسته کوي.
نوموړي د طالبانو په لیکو کې د وروستیو جګړو پړه پر ملا منصور او د آی ايس آی پر شبکې ور اچولې او زیاته کړې یې ده، چې دوی به تر خپلې وسې له دې ډلې سره مبارزه وکړي.
که څه هم د ملا اختر محمد منصور پلوي ډلې تر اوسه په دې اړه څه نه دي ویلي، خو د طالبانو د دې جنګ پر اعلان د بادغیس ولسي وګړي اندېښمن دي.
دوی وايي، که چېرته د طالبانو تر منځ جګړه ونښلي نو ډېر زیان به ولسي وګړو ته ورسېږي.
باید وویل شي، چې تر دې وړاندې هم په بادغس، هرات او زابل ولایتونو کې د وسله والو طالبانو د یادو دوه ډلو تر منځ خونړۍ جګړې شوې، چې دواړو لورو ته په کې درنده مرګ ژوبله اوښتې.
دا اعلان پر داسې مهال کېږي، چې دوه ورځې وړاندې پاکستاني رسنیو خبر ورکړ، چې ملا محمد رسول د پاکستان د امنیتي ځواکونو له خوا په دغه هېواد کې نیول شوی، خو د ملا محمدرسول مرسیتال او د دې ډلې ویاند ملا عبدالمنان نیازي دغه څرګندونې رد کړې.
جمهورآژانس:کابل