دښمن به ونشي کولاى په کندهار کې خپل اهداف تر لاسه کړي

د سویلي زون درستیزوال او د کندهار امنیه قوماندان جنرال عبدالرازق وايي، د راتلونکي نوي کال له پاره یې پوره امنیتي چمتوالي نیولی او دښمن به ونشي کولای په کندهار ولایت کې خپلو اهدافو ته ورسې.
د جمهور آژانس د خبر مخې جنرال عبدالرازق دغه څرګندونې د طالبانو د مشر ملا اختر محمد منصور د هغه څرګندونو په ځواب کې کړې، چې پر طالب وسله والو یې پر خپل دښمن د وروستي غچ اخیستو غږ کړي.
جنرال رازق تېره ورځ د یوې خبري غونډې پر مهال کندهار اوس مهال د خپلو ګاونډیو ولایتونو له ناامنیو رنج وړي، خو په وینا یې د کندهار د امنیت له پاره پوره چمتوالی نیولی شوی.
نوموړي وویل، که څه هم په هلمند کې د طالبانو ځيني رهبران اوسي او ځينې يې تګ را تګ کوي خو دا خبره یې رد کړه، چې ګنې طالبانو د کوټې ټوله شورا هلمند ته انتقال کړې، بلکې په وینا یې پاکستان او د طالبانو مرسته کوونکي نه غواړي چې د طالبانو د کويټې شورا دې په ټولييزه توګه افغانستان ته انتقال شي.
جنرال رازق د سولې پروسه هم یوازې پر خبرو ولاړه وبلله او ویې ویل، چې ځینې ګاونډي هېوادونه په افغانستان کې سوله نه غواړي او نه هم ورته ژمن دي، بلکې غواړي جګړه پراخه کړي.
ښاغلي رازق د سولې په اړه پاکستان ته په اشاره سره وویل، چې د پاکستان هدفونه او شرطونه داسي دي، چې ان د دوی د لاس نظام هم ورسره نه منل.
نوموړي د خپلو خبرو په پای کې وویل، چې تېر کال د ټول افغان ولس له پاره سخت و ځکه چې افغان امنیتي ځواکونو په یوازې توګه له مخالفینو سره جګړه کوله.
نوموړي پر حکومت غږ وکړ، چې د راتلونکي کال له پاره پوره پوره چمتوالی ونیسي.
جنرال رازق دغه څرګندونې پر داسې مهال کوي، چې دا مهال د هېواد په یو شمېر ولایتونو کې افغان امنیتي ځواکونو او وسله والو تر منځ سختې جګړې روانې دي.
جمهورآژانس:کندهار