پر پاچاخان پوهنتون په شوي برید کې افغان حکومت نه تورنوم

د پاکستان لومړی وزیر نواز شریف وايي، که څه هم لومړنیو پلټنو ښودلې چې پر پاچاخان پوهنتون برید کوونکي له افغانستان راغلي و، خو په دغه برید کې افغان حکومت پر لاس لرلو نه تورنوي.
د جمهور آژانس د خبر له مخې پر پاچاخان پوهتون د تېرې چهار شنبې په ورځ ډلیز وسله وال برید وشو، چې ۲۵ تنه په کې و وژل شول او تر ۶۰ پورې ټپیان شول.
له دغه برید یوه ورځ وروسته د پاکستان د پوځ ویاند عاصم باجوه وویل چې دغه برید کوونکي له افغانستانه راغلي و او دوی له هغوی څخه ځینې اسناد او افغاني سیم کارتونه تر لاسه کړي، چې له پولې پورې غاړې نه پرې رهبري کېدل.
خو د باجوه تر دغه خبرو وروسته د پاکستان د مخابراتو وزارت خبر ورکړ، چې په پاکستان کې افغاني سیم کارټونه کار نه کوي.
دغه راز د افغانستان د کورنیو چارو وزارت هم د پاکستان د پوځ دغه ادعا نه یوازې دا چې په کلکه یې رد کړه، بلکې ویې ویل، چې پاکستان خپله ښه پوهېږي، چې د ترهګرو ځالې او پتڼځایونه چېرته دي.
ولې د پاکستان لومړي وزیر نواز شریف هم ویلي، چې برید کوونکي له افغانستان څخه ورغلي و خو په وینا یې افغان حکومت په دې برخه کې نه تورنوي.
نواز شریف زیاته کړې، چې پاکستان او افغانستان موافقه کړې، چې خپلې خاورې به د یو بل پر ضد نه کارول کېږي چې په خبره یې پاکستان دا موافقه په بشپړ ټول رعایتوي او له افغانستانه هم همداسې غواړي.
که څه هم د پاکستان پوځ او لومړی وزیر وايي، چې برید کوونکي له افغانستان ورغلي و، خو په خیبر پښتونخوا کې زرګونو مدني فعالانو او دغه راز په هند کې د پاچا خان لسمۍ یاسمین نګار خان پر پاچا خان پوهنتون په برید کې د پاکستان د حکومت لاس بولي.
د عدم تشدد د ستر مبارز خان عبدالغفار خان«پاچا خان» لمسۍ یاسمین نګارخان وايي په خیبرپښتونخوا کې پر پاچا خان پوهنتون برید هغه ډلې کړی، چې د پاکستان د حکومت له خوا حمایه کېږي.
اغلې نګار خان د هندوستان ټایمز ورځپاڼې سره په یوه مرکه کې ویلي« پښتانه هېڅکله هم د خان عبدالغفار خان سپکاوی نه کوي او چیرته چې د نوموړي نوم اخیستل کېږي هلته په ډېر درناوي له خلکو سره چلند کېږي، په باچاخان پوهنتون د چارشنبې د ورځې حمله چې په لسګونو محصلین او استادان په کې قرباني شول، داسې ډلې کړې ده چې د پاکستان د حکومت له خوا حمایه کېږي.‌»
اغلې نګار خان دغه ورځپاڼې ته ویلي، اسلام آباد دا برید قصدا په دې خاطر پلان او تر سره کړی چې پښتانه د یو بل پر وړاندي را وپاروي په خاصه توګه د افغانستان او پاکستان پښتانه چې د وروڼو په توګه ژوند کوي یو د بل اغیار وګرځوي.
جمهور آژانس:کابل