ننګرهار کې د یوې کورنۍ ۸ تنه و وژل شول

چارواکي وايي، نامعلومه وسله والو کسانو په ننګرهار ولایت کې د ښځو او ماشومانو په ګډون د یوې کورنۍ ۸ تنه غړي وژلي دي.
د جمهور آژآنس د خبر له مخې دغه پېښه تېره شپه د ننګرهار ولایت د بهسودو ولسوالۍ د قلعه میرزا په سیمه کې رامنځ ته شوې ده.
د ننګرهار د والي ویاند عطاالله خوږیاڼی وايي، پېښه په یاد کلي کې د یوسف په نوم د یوه کس په کور کې رامنځ ته شوې ده.
نوموړي وویل، چې د يوسف کور ته درې تنه ميلمانه ورغلي وو، چې د ډوډۍ خوړلو وروسته یې د یوسف په ګډون د هغه مور، میرمن، څلور لورانې او یو زوی په ډزو وژلي دي.
د والي ویاند زیاتوي، چې د دې پيښې په اړه پلټنې روانې دي او لومړني معلومات ښيي چې دغه درې کسان يې نېږدې میلمانه و ځکه د دې کور په اشپزخانه کې د میلستیا تياری ورته نیول شوی و.
ویل کېږی، یوسف اصلآ د پکتیا ولایت اوسیدونکی دی چې له تېرو څلورو کلونو راهیسې په ننګرهار کې میشت دی.
جمهور آژانس
معروف سادات:ننګرهار