د اسیا زړه کنفرانس کې کړې ژمنې د پاکستان له پاره وروستی چانس دی!

«د اسیا زړه کنفرانس کې د پاکستان او افغانستان تر منځ شوي توافقات او ژمنې د پاکستان له پاره یو طلايي او وروسته چانس دی، که دا ځل پاکستان پر خپلو کړو ژمنو وفا ونه کړه، صادقت یې ښکاره نه کړ، او په خپله خاوره کې یې د ترهګرو ځالې ختمې نه کړې، نو بیا به د افغانستان، امریکا، چین او سیمې هېواونو سره د دوستۍ چانس له لاسه ورکړي، دا زموږ وروستۍ خبره ده.»
دا څرګندونې د افغانستان د ولسي جرګې دوهم مرستیال محمد نذیز احمدزي د جمهور آژانس سره په یوه ځانګړې مرکه کې وکړې او ویې ویل چې که چېرې پاکستان دا ځل پر خپلو ژمنو وفا وکړي، نو له یوې خوا به یې له افغانستان سره اړیکې ښې او پراخه شي او له بلې خوا به هغه باور چې په نړیواله کچه یې له لاسه ورکړی بېرته تر لاسه کړي.
ښاغلی احمدزی پاکستان ته د ولسمشر غني سفر او دغه راز د افغان سولې په اړه له سره پلېدونکو خبرو ته ځکه خوشبین دی، چې په وینا یې دا ځل امریکا او چین په دغه خبرو کې د ناظر او یا هم ضمانت کوونکي په توګه شاهدان دي.
نوموړي وايي، که څه هم پاکستان په تېر کې په خپلو کړو ژمنو نه دی درېدلی او افغانستان هر وخت خپلې ژمنې پوره کړې، خو زیاتوي، چې ښايي پاکستان دا ځل درک کړې وي، چې نور نه غواړي په نړیواله کچه نور هم د انزوا خوا ته ولاړ شي.
هغه په خپلو خبرو کې وویل« د افغان دولت پخوا هم دا برنامه وه، دا هیله او توقع یې وه، چې ستونزو د حل حق اولیت یې خپل منطقوي ګاونډیانو ته ورکړی و، په ځانګړې توګه پاکستان ته، موږ په وار وار له پاکستان سره په وضاحت خپلې خبرې کړې خو بدبختانه پاکستان خپلو ژمنو وفا نه ده کړې او افغان دولت په خپلو ژمنو وفا کړې، دا چې اوس نوې خبرې شروع شوې په دې کې مهمه خبره دا ده، چې چین زموږ ستراتېزیګ او اقتصادي دوست دی او دغه راز امریکا چې افغانستان ورسره امنیتي تړون لري، د دغه نویو خبرو د شاهد یا ضمانت کوونکو په توګه شاهدان دي، نو زما په اند نوې خبرې به ډېر پور اهمیت وي، او پاکستان به هم نور ونشي کولای چې هم افغانستان سره علني دوښمني وکړي، هم امریکا او چین سره، او پاکستان هم نه غواړي، چې دومره یوازې شي او د ټولو ملکونو بدي پر غاړه واخلي.»
ښاغلی احمدزی دغه راز د افغانستان او پاکستان تر منځ د سولې په تړاو نویو ژمنو ته کتو سره وايي، که لومړی پاکستان پر خپلو ژمنو وفاه وکړه، نو افغانستان هم هله چمتو دی، چې د پاکستان په نیوکو کې ورسره مرسته وکړي.
ده وویل« ښه خبره دا ده چې پاکستان د ترهګرو ځالې ختمې کړي او راشي د سولې په اړه خبرې وکړي، موږ باید یو بل ته احترام ولرو، او په خپلو ژمنو کې صادق و اوسو، موږ بار بار ویلي، چې جنګ پر موږ تپل شوی دی، د موږ خاوره د هېچا پر وړاندې نه ده کارول شوې او نه به هم وکارول شي، خو بیا هم که دوی کوم مخالفین لري، نو اول غږ موږ کړی اول دې زموږ مخالفین له منځه یوسي موږ حاضرو یو چې که بیا دوی کومې نیوکې درلودې په هغې کې مرسته ورسره وکړو.»
نوموړي د سولې په اړه نوې پلېدونکې خبرې د افغانستان له پاره هم یو طلايي چانس بولي او وايي که چېرې افغان دولت دغه چانس څخه سمه ګټه پورته کړي او په سالمه توګه یې مدیریت او رهبري کړي نو ښايي افغانان د سولې ارمان ته ورسېږي.
د ولسي جرګې دوهم مرستیال زیاتوي، د دې له پاره چې موږ له دغه چانس څخه سمه ګټه پورته کړو، اړینه ده، چې ملي ګټو ته ترجع ورکړو او په خپل منځ کې یو ملي وحدت او د نظر یووالي رامنځ ته کړو.
هغه وړاندې وویل« دا زموږ افغانانو او افغان دولت له پاره یو طلايي چانس دی، د دې له پاره چې د دغه طلايي چانس څخه ګټه پورته کړو، لومړی د افغانانو له پاره وحدت او یووالی پکار دی، باید زموږ ټولې دولتي او غیر دولتي ادارې د ملي ګټو په اړه یو نظر ولري، نه دا متفاوت نظرونه او نه هغه نظرونه چې د نورو ملکونو له پاره یې موږ لرو، اول خو موږ باید خپلو ملي ګټو ته ترجع ورکړو، اکثره برنامه داسې کېږي، چې موږ یو موقف او خبرو ته رسېږو بیا د غیره ملکونو فرمایشونو په کې شامل شي، نو زموږ برنامه شنډه کړي، دا ځل زه یعقن لرم او له ټولو سیاسیون غواړم چې د ملي ګټو له پاره یو و اوسو، دغه برنامې ته توقع لرم، که موږ درسته رهبري وکړه، سم نظارت مو وکړ، نو افغانان به د سولې ارمان ته ورسېږي.»
ښاغلی احمدزی دې ته هم خوشبینه دی او دا د سولې له پاره یو بل ښه چانس بولي، چې په وینا يې اوس ډېر وسله وال پر دې پوه شوي، چې دوی د خپلو مشرانو له خوا تېرایستل کېږي، او هغوی یې د پردیو د ګټو له پاره جنګوي.
هغه وویل«په طالبانو کې طالبانو جنګ د اسلام په نامه کاوه، جنګ اصلي غریبې طبقې کولو اوس غریبه طبقه پر دې پوهېدلې چې موږ خپل رهبران غولوي، لکه د ملا منصور دادالله مړینه او دا رقم د نورو غټانو مړینه چې د چوکۍ پر سره وجنګېدل او یو بل یې مړ کړل، دغه کار پر ټولو طالبانو منفي تاثیر وکړ هغوی اوس دا درک کړې، چې دلته د اسلام جنګ نشته، دلته د مذهب جنګ نشته، بلکې دلته د چوکۍ جنګ دی، نو دا هم د افغانستان د نظام له پاره یو طلايي چانس دی، چې ښه ګټه ترې پورته کړي.»
جمهور آژانس
وحید فرزان:کابل